തിരുവനന്തപുരം: സോഷ്യൽമീഡിയ ഇൻഫ്‌ലുവൻസറായ പ്ലസ്ടു വിദ്യാർഥിനി ജീവനൊടുക്കിയ സംഭവത്തിൽ ആൺസുഹൃത്ത് ബിനോയിക്കെതിരെ പോക്‌സോ വകുപ്പ് ചുമത്തി കേസെടുത്തു. ആൺ സുഹൃത്തുമായി പെൺകുട്ടി നടത്തിയ വാട്‌സ്ആപ്പ് ചാറ്റുകൾ പോലീസ് വീണ്ടെടുത്തു.
ആത്മഹത്യയിൽ ആൺ സുഹൃത്തിന്റെ പങ്ക് പോലീസ് വിശദമായി പരിശോധിക്കും. ബിനോയിയെ കൂടുതൽ ചോദ്യം ചെയ്യാനാണ് പോലീസിന്റെ നീക്കം. പ്രായപൂർത്തിയാകുന്നതിനു മുൻപ് പെൺകുട്ടി പീഡനത്തിനിരയായി എന്ന കണ്ടെത്തലിനെ തുടർന്നാണ് കഴിഞ്ഞദിവസം പോക്‌സോ വകുപ്പുകൾ ചുമത്തി ബിനോയിയെ പൂജപ്പുര പോലീസ് അറസ്റ്റ് ചെയ്തത്.
യുവാവിന്റെ ഫോൺ പരിശോധിച്ചതിൽ നിന്നും നിർണായക തെളിവുകൾ ലഭിച്ചിട്ടുണ്ടെന്നാണ് വിവരം. സൈബർ ടീം വീണ്ടെടുത്ത ബിനോയ് നടത്തിയ വാട്‌സ്ആപ്പ് ചാറ്റുകളിൽ പെൺകുട്ടിയെ ഭീഷണിപ്പെടുത്തിയിരുന്നതായി തെളിവ് ലഭിച്ചിട്ടുണ്ട്.
സൈബർ ആക്രമണമല്ല മരണകാരണമെന്ന് കുടുംബം നേരത്തെ പ്രതികരിച്ചിരുന്നു. എന്നാൽ ഇതും മരണത്തിലേക്ക് നയിച്ചെന്നാണ് പോലീസ് നിഗമനം. വരും ദിവസങ്ങളിൽ അടുത്ത സുഹൃത്തുക്കളുടെ മൊഴി രേഖപ്പെടുത്തും.
Discussion about this post