കണ്ണൂര്‍: ജോലി സ്ഥലത്തേക്ക് പോകേണ്ട തിരക്കില്‍ ഹെല്‍മറ്റ് ധരിച്ച ബൈക്ക് യാത്രക്കാരന്റെ തലയില്‍ പാമ്പ് കടിച്ചു. കണ്ണൂരിലാണ് സംഭവം. പടിയൂര്‍ നിടിയോടിയിലെ കെ രതീഷിനാണ് പാമ്പുകടിയേറ്റത്. നാല്‍പ്പതുവയസ്സായിരുന്നു.
വീട്ടില്‍ നിര്‍ത്തിയിട്ട ബൈക്കിന് മുകളില്‍വെച്ച ഹെല്‍മറ്റില്‍ കയറിക്കൂടിയതായിരുന്നു കുട്ടി പെരുമ്പാമ്പ്. എന്നാല്‍ ഇക്കാര്യം രതീഷ് അറിഞ്ഞിരുന്നില്ല. തലയില്‍ കടിയേറ്റപ്പോഴാണ് രതീഷ് ഹെല്‍മറ്റ് അഴിച്ചുനോക്കിയത്.
ഹെല്‍മറ്റിന്റെ അകത്ത് പാമ്പാണെന്ന് കണ്ടപ്പോള്‍ രതീഷ് വെപ്രാളത്തിനിടയില്‍ ഹെല്‍മറ്റ് എറിഞ്ഞു. കടിച്ച പാമ്പിനെ തിരിച്ചറിയാനും കഴിഞ്ഞില്ല. ഉടന്‍ ബന്ധുക്കള്‍ രതീഷിനെ കണ്ണൂരിലെ സ്വകാര്യ ആശുപത്രിയിലെത്തിച്ചു.
പരിശോധനയ്ക്കിടയിലാണ് പെരുമ്പാമ്പാണെന്നും വിഷമില്ലാത്തതാണെന്നും മനസ്സിലായത്. വനം വകുപ്പിലെ താത്കാലിക ജീവനക്കാരനാണ് രതീഷ്.