തിരുവനന്തപുരം: വീടിന്റെ ചുമരിടിഞ്ഞ് വീണ് വീട്ടമ്മയ്ക്ക് ദാരുണാന്ത്യം. പോത്തന്കോട് ഇടത്തറ വാര്ഡില് ശ്രീകല (61) ആണ് മരിച്ചത്. മഴയില് കുതിര്ന്ന ചുമരാണ് ഇടിഞ്ഞുവീണത്. പുതിയ വീട് പണിതതായിരുന്നു. എന്നാല് ഇതിനിടെ പഴയ വീട് ഇടിച്ച് മാറ്റിക്കൊണ്ടിരിക്കുകയായിരുന്നു.
അപ്പോഴാണ് മഴ കനത്തത്. ഇതോടെ പഴയ വീട് പൊളിക്കുന്ന പ്രവൃത്തി നിര്ത്തിവച്ചു. ഈ ഭാഗങ്ങള് മഴ ശക്തിപ്പെട്ടതോടെ കുതിര്ന്നുപോകാന് തുടങ്ങി. അപകടം മനസിലാക്കാതെ ഇന്ന് രാവിലെ ഇവിടെ സൂക്ഷിച്ചിരുന്ന വിറകെടുക്കാനെത്തിയതാണ് ശ്രീകല. ഈ സമയത്താണ് അപകടം നടന്നത്. ഉടനെ തന്നെ ഇവരെ മെഡിക്കല് കോളേജിലെത്തിച്ചെങ്കിലും അപ്പോഴേക്കും മരണം സംഭവിച്ചിരുന്നു.