തൃശ്ശൂർ: വീണ്ടും ട്രെയിനിൽ ടിടിഇമാർക്ക് നേരെ ആക്രമണം. ടിക്കറ്റ് ആവശ്യപ്പെട്ട ടിടിഇക്കുനേരെ കൈയ്യേറ്റശ്രം ഉണ്ടാവുകയും ഉദ്യോഗസ്ഥരെ തള്ളി മാറ്റി പ്രതി ഓടി രക്ഷപ്പെടാൻ ശ്രമിക്കുകയുമായിരുന്നു. ബെംഗളൂരു-കന്യാകുമാരി എക്സപ്രസിലെ ഉദ്യോഗസ്ഥരായ മനോജ് വർമ, ഷമ്മി എന്നിവർക്ക് നേരെയാണ് ആക്രമണം ഉണ്ടായത്. സംഭവത്തിൽ കൊല്ലം സ്വദേശി അശ്വിനും സുഹൃത്തും ആർപിഎഫിന്റെ പിടിയിലായി.
തൃശ്ശൂർ വടക്കാഞ്ചേരിയിൽ വെച്ചായിരുന്നു സംഭവം.ടിക്കറ്റ് ഇല്ലാത്തത് ചോദ്യംചെയ്തതിനെ തുടർന്ന് യാത്രക്കാരൻ ടിടിഇ മനോജിനെ തള്ളിമാറ്റി ഓടുകയായിരുന്നു. ഈ സമയത്ത് തീവണ്ടി വടക്കാഞ്ചേരി സ്റ്റേഷനിലെത്തിയിരുന്നു. തുടർന്ന് ഇയാൾ ഇറങ്ങി ഓടി. എന്നാൽ, മനോജ് കൈമാറിയ വിവരം അനുസരിച്ച് ടിടിഇ ഷമ്മി ഇയാളെ തടഞ്ഞു. എന്നാൽ, ഷമ്മിയേയും തള്ളിമാറ്റി പ്രതി പുറകിലേക്ക് ഓടി മറഞ്ഞു.
ഇയാളെ പിന്നീട് ആർപിഎഫിന്റെ സഹായത്തോടെ നടത്തിയ പരിശോധനയിൽ എസി കോച്ചിലെ ശുചിമുറിയിൽനിന്ന് പിടികൂടുകയായിരുന്നു. യാത്രക്കാരുടെ മുന്നിൽവെച്ച് ഇയാളുടെ ബാഗ് പരിശോധിച്ചപ്പോൾ ബാഗിൽ നിന്നും കഞ്ചാവും കണ്ടെത്തി.