കൊച്ചി: കടയില്‍ കയറി യുവാവിനെ കുത്തിക്കൊന്നു. എറണാകുളം തോപ്പുംപടിയിലാണ് സംഭവം. തോപ്പുംപടി മൂലംകുഴി സ്വദേശി ബിനോയ് സ്റ്റാലിനാണ് മരിച്ചത്. സംഭവത്തിന്റെ സിസിടിവി ദൃശ്യങ്ങള്‍ പുറത്തുവന്നിട്ടുണ്ട്.
തോപ്പുംപടി അത്തിപ്പുഴ സ്വദേശി അലനാണ് ബിനോയിയെ ആക്രമിച്ചത്. മുന്‍വൈരാഗ്യമാണ് കൊലപാതകത്തിലേക്ക് നയിച്ചതെന്നാണ് വിവരം. ബിനോയ് ജോലിചെയ്തിരുന്ന സ്ഥാപനത്തിലെത്തി കത്തി കൊണ്ട് പലതവണ കുത്തുകയായിരുന്നു.
കഴിഞ്ഞ ദിവസം വൈകിട്ടായിരുന്നു സംഭവം. അലന്‍ ബിനോയിയെ കൊലപ്പെടുത്താനുള്ള ലക്ഷ്യത്തോടെ കത്തിയുമായാണ് എത്തിയത്. സംസാരിക്കുന്നതിനിടെ ഇരുവരും തമ്മില്‍ വാക്കുതര്‍ക്കം ഉണ്ടായതിന് പിന്നാലെ അലന്‍ കത്തിയെടുത്ത് ബിനോയിയുടെ ശരീരത്തില്‍ പലതവണ കുത്തിയിറക്കുകയായിരുന്നു.
അതിക്രൂരമായി യുവാവിനെ കുത്തിക്കൊന്ന ശേഷം അലന്‍ യാതൊരു ഭാവഭേദവുമില്ലാതെ പ്രതി കത്തി അരയില്‍ തിരുകി പുറത്തേക്ക് പോകുന്നതും ദൃശ്യങ്ങളിലുണ്ട്.കൊലപാതക വിവരം കടയുടമയാണ് പോലീസിനെ അറിയിച്ചത്.
സംഭവത്തിന് ശേഷം രക്ഷപ്പെട്ട പ്രതിക്കായി പൊലീസ് തെരച്ചില്‍ നടത്തുകയാണ്. ബിനോയിയെ കൊല്ലുമെന്ന് അലന്‍ നേരത്തേ ഭീഷണിപ്പെടുത്തിയിരുന്നതായി പൊലീസിന് വിവരം ലഭിച്ചിട്ടുണ്ട്.
Discussion about this post