കൽപ്പറ്റ: വയനാട്ടിലെ രോഗികൾക്ക് ആശ്വാസമായി സർക്കാർ മെഡിക്കൽ കോളേജിൽ കൂടുതൽ സൗകര്യങ്ങൾ. കോഴിക്കോട് മെഡിക്കൽ കോളേജിനെ മാത്രം ആശ്രയിച്ച് ചികിത്സ നടത്തിയിരുന്ന വയനാട്ടിലെ സാധാരണക്കാർക്ക് ആശ്വാസമാവുകയാണ് വയനാട് സർക്കാർ മെഡിക്കൽ കോളജിൽ സ്ഥാപിച്ച പുതിയ കാത്ത് ലാബ്.
പുതിയ പ്രവർത്തനസജ്ജമായതോടെ തിങ്കളാഴ്ച രണ്ടുപേരെ ആൻജിയോഗ്രാമിന് വിധേയരാക്കി തുടർചികിത്സ ഉറപ്പാക്കി. ഹൃദ്രോഗ വിദഗ്ധരായ ഡോ. പ്രജീഷ് ജോൺ, ഡോ. പി ഷിജോയ് എന്നിവരുടെ നേതൃത്വത്തിലാണ് ആൻജിയോഗ്രാം നടത്തിയത്. കാത്ത് ലാബ് ടെക്‌നീഷ്യൻ, നഴ്‌സ്, എക്കോ ടെക്‌നീഷ്യൻ എന്നിവരുൾപ്പെടുന്ന സംഘവും ആദ്യ ആൻജിയോഗ്രാമിൽ പങ്കാളികളായി. ചികിത്സയ്ക്ക് നേതൃത്വം നൽകിയ മെഡിക്കൽ കോളജിലെ മുഴുവൻ ടീമിനേയും ആരോഗ്യ മന്ത്രി വീണാ ജോർജ് അഭിനന്ദിച്ചു.
വയനാട് ജില്ലയിലെ ഗോത്ര വിഭാഗത്തിൽപ്പെട്ട രണ്ടുപേർക്കാണ് കാത്ത് ലാബിൽ ആൻജിയോഗ്രാമം ചികിത്സ നൽകിയത്. അടുത്ത ഘട്ടത്തിൽ ആൻജിയോപ്ലാസ്റ്റി ആരംഭിക്കാനാണ് ലക്ഷ്യമിടുന്നത്. കാത്ത് ലാബിൽ എക്കോ പരിശോധനകൾ നേരത്തെ ആരംഭിച്ചിരുന്നു. രക്തധമനികളിൽ ഉണ്ടാകുന്ന തടസങ്ങൾക്കും കാത്ത് ലാബിൽ നിന്ന് ചികിത്സ ലഭിക്കും.
രക്തത്തിന്റെ പമ്പിങ് കുറയുന്നത് തടയാനുള്ള ഐസിഡി സംവിധാനവും കാത്ത് ലാബിലുണ്ടാകും. എല്ലാ ചൊവ്വാഴ്ചയും രോഗികൾക്ക് ഒപിയിൽ ഹൃദ്രോഗ വിദഗ്ധന്റെ സേവനം ലഭിക്കും.സംസ്ഥാന സർക്കാരിന്റെ പ്ലാൻ ഫണ്ടിൽ നിന്ന് എട്ടുകോടി രൂപ ചെലവഴിച്ചാണ് കാത്ത് ലാബ് സജ്ജമാക്കിയത്. ഏതാനും മാസങ്ങൾക്ക് മുമ്പാണ് മുഖ്യമന്ത്രി ഇതിന്റെ ഉദ്ഘാടനം നിർവഹിച്ചത്.
കാത്ത് ലാബ് സിസിയുവിൽ ഏഴു കിടക്കകളാണ് സജ്ജീകരിച്ചിട്ടുള്ളത്. അടുത്തിടെ വയനാട് ജില്ലയിൽ ആദ്യമായി സിക്കിൾ സെൽ രോഗിയിൽ ഇടുപ്പ് മാറ്റിവയ്ക്കൽ ശസ്ത്രക്രിയ വയനാട് മെഡിക്കൽ കോളേജ് ആശുപത്രിയിൽ വിജയകരമായി നടത്തിയതും വലിയ ആശ്വാസം നൽകിയിരുന്നു.