കോട്ടയം : കണ്ടെയ്നര് ലോറിയിടിച്ച് സ്കൂട്ടര് യാത്രക്കാരിക്ക് ദാരുണാന്ത്യം. കോട്ടയത്താണ് സംഭവം. ഭര്ത്താവിന് പിറന്നാള് സമ്മാനം വാങ്ങാനായി പോകുന്നതിനിടെയായിരുന്നു അപകടം സംഭവിച്ചത്.
കോട്ടയം നീറിക്കാട് കല്ലമ്പള്ളി കൊല്ലംകുഴിയില് ബിനോയുടെ ഭാര്യ പ്രിയ ബിനോയി ആണ് മരിച്ചത്. നാല്പ്പത്തിയെട്ട് വയസ്സായിരുന്നു. കഴിഞ്ഞ ദിവസം വൈകിട്ട് ആറോടെ കോട്ടയം നാഗമ്പടം പാലത്തിലായിരുന്നു അപകടം.
ബിനോയിയും പ്രിയയും ചേര്ന്ന് പിറന്നാള് സമ്മാനം വാങ്ങാന് നഗരത്തിലേയ്ക്ക് പോകുംവഴി പാലംകയറി വന്ന ലോറി ബിനോയി ഓടിച്ചിരുന്ന സ്കൂട്ടറില് തട്ടുകയായിരുന്നു.
ഇടിയുടെ ആഘാതത്തില് പ്രിയ റോഡില് തലയിടിച്ച് വീണു. ഈ ഗുരുതര പരിക്കാണ് മരണകാരണമായത്. ബിനോയി കാര്യമായ പരിക്കുകളില്ലാതെ രക്ഷപ്പെട്ടു.
പൊടി ഉത്പന്നങ്ങളും, സ്പൈസസും ഓട്ടോറിക്ഷയില് എത്തിച്ച് ഹോള്സെയില് വില്പന നടത്തുകയാണ് ബിനോയി. മക്കള് : ഗംഗ (ഫാഷന് ഡിസൈനര്), ഗായത്രി ( പത്താം ക്ലാസ് വിദ്യാര്ത്ഥിനി).
Discussion about this post