എറണാകുളം: കോതമംഗലം ടൗണില്‍ തെരുവുനായ ആക്രമണം. ടൗണിലെ വിവിധയിടങ്ങളിലായി എട്ടുപേര്‍ക്കാണ് നായയുടെ ആക്രമണത്തില്‍ പരിക്കേറ്റത്. ഒരേ നായ ആണ് എട്ടുപേരെയും ആക്രമിച്ചത്. ഇന്ന് രാവിലെയാണ് സംഭവം.
കോതമംഗലം അമ്പലത്തറ ഭാഗത്ത് പള്ളിയില്‍ പോയി മടങ്ങി വരുകയായിരുന്ന സ്ത്രീയെയാണ് ആദ്യം നായ ആക്രമിച്ചത്. നടന്നു പോകുന്നതിനിടെ പിന്നില്‍ നിന്ന് എത്തി തെരുവുനായ കടിക്കുകയായിരുന്നു. ഇതിനുശേഷം ഇതേ നായ തന്നെ കോതമംഗലം ടൗണിലെത്തി പലരെയും കടിച്ചു.
നായയുടെ ആക്രമണത്തില്‍ പരിക്കേറ്റ എട്ടുപേരും കോതമംഗലം താലൂക്ക് ആശുപത്രിയില്‍ ചികിത്സ തേടി. പേവിഷ ബാധയ്‌ക്കെതിരായ വാക്‌സിന്റെ കുറവുള്ളതിനാല്‍ നാലുപേരെ മൂവാറ്റുപ്പുഴ താലൂക്ക് ആശുപത്രിയിലേക്ക് കൊണ്ടുപോകേണ്ട സാഹചര്യവുമുണ്ട്. അവിടെ എത്തിച്ചശേഷം ഇവര്‍ക്കും വാക്‌സിന്‍ നല്‍കും. ആക്രമകാരിയായ നായ് ടൗണിന്റെ ഒരു ഭാഗത്ത് അവശനിലയില്‍ കിടക്കുന്നുണ്ടെന്ന് നാട്ടുകാര്‍ പറഞ്ഞു.