ഇടുക്കി: നടുറോഡില്‍ ഓട്ടോഡ്രൈവര്‍ക്ക് ക്രൂര മര്‍ദനം. ഇടുക്കിയിലെ കട്ടപ്പനയിലാണ് സംഭവം. പേഴുംകവല സ്വദേശി സുനില്‍കുമാറിനെയാണ് അതിദാരുണമായി മര്‍ദിച്ചത്. സംഭവത്തില്‍ മൂന്ന് പേരെ പൊലീസ് കസ്റ്റഡിയിലെടുത്തിട്ടുണ്ട്.
അയല്‍വാസികളാണ് സുനില്‍കുമാറിനെ മര്‍ദിച്ചത്. കട്ടപ്പന സ്വദേശികളായ സാബു, സുരേഷ്, ബാബു, എന്നിവരാണ് സുനില്‍കുമാറിനെ വഴിയില്‍ തടഞ്ഞു നിര്‍ത്തി ക്രൂരമായി മര്‍ദിച്ചത്.
സ്ഥല തര്‍ക്കത്തിന്റെ പേരിലായിരുന്നു മര്‍ദനം. ഇന്നലെ രാത്രിയില്‍ കട്ടപ്പന ഇരട്ടയാര്‍ റോഡിലാണ് സംഭവം. സുനില്‍ കുമാര്‍ ഭാര്യയ്ക്കും മകള്‍ക്കുമൊപ്പം ഓട്ടോയില്‍ വീട്ടിലേക്ക് വരികയായിരുന്നു.
ഇതിനിടെയാണ് ആക്രമണം നടന്നത്. സുനില്‍കുമാറിനെ റോഡിലേക്ക് തള്ളിയിട്ട ശേഷം വടി ഉപയോഗിച്ചായിരുന്നു മര്‍ദ്ദനം. മര്‍ദിക്കുന്നത് തടയാനെത്തിയവരെയും ആക്രമി സംഘം വിരട്ടിയോടിച്ചു.
പ്രതികളായ മൂന്ന് പേരെയും കട്ടപ്പന പോലീസ് കസ്റ്റഡിയിലെടുത്തു. സാരമായി പരുക്കേറ്റ സുനില്‍കുമാര്‍ ഇടുക്കി മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.സ്ഥലതര്‍ക്കമാണ് ആക്രമണത്തിന് പിന്നിലെന്നാണ് സൂചന.