പാലക്കാട്: ആനയെ ലോറിയില്‍ നിന്ന് ഇറക്കുന്നതിനിടെ ആനയുടേയും ലോറിയുടേയും ഇടയില്‍പ്പെട്ട് പാപ്പാന് ദാരുണാന്ത്യം. പാലക്കാടാണ് സംഭവം. കുനിശ്ശേരി കൂട്ടാല സ്വദേശി ദേവനാണ് മരിച്ചത്.
അമ്പത്തിയെട്ട് വയസ്സായിരുന്നു. ചാത്തപുരം ബാബുവെന്ന ആനയുടെ ഒന്നാം പാപ്പാനായിരുന്ന ദേവന്‍. മേലാര്‍കോട് കമ്പോളത്തിനു സമീപം ബുധനാഴ്ച വൈകിട്ടു നാലുമണിയോടെ ആയിരുന്നു സംഭവം
ആനയെ പാലക്കാട് മേലാര്‍കോട് താഴക്കോട്ടുകാവ് വേലയ്ക്കായി കൊണ്ടുവന്നതായിരുന്നു. ലോറിയില്‍ നിന്ന് ആനയെ ഇറക്കുന്നതിനിടെ പാപ്പാന് ആനയുടേയും ലോറിയുടേയും ഇടയില്‍പ്പെടുകയായിരുന്നു.
ആനയെ ലോറിയില്‍ നിന്ന് ഇറക്കാന്‍ വേണ്ടി ആനയുടെ മുന്നില്‍ നിന്ന് തള്ളുകയായിരുന്നു. എന്നാല്‍ അപ്രതീക്ഷിതമായി ആന മുന്നോട്ടു നീങ്ങി. ഇതോടെ ആനയ്ക്കും ലോറിയില്‍ ഉറപ്പിച്ച ഇരുമ്പ് ദണ്ഡിനും ഇടയില്‍ കുടുങ്ങുകയായിരുന്നു ദേവന്‍.
ഗുരുതരമായി പരിക്കേറ്റിരുന്നു. ഉടന്‍തന്നെ നെന്മാറയിലുള്ള ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
Discussion about this post