കോണ്‍ഗ്രസ് നേതാവ് പദ്മജ വേണുഗോപാലിന്റെ ബിജെപി പ്രവേശനം കേരള രാഷ്ട്രീയത്തെ ഒന്നടങ്കം നടുക്കത്തിലാഴ്ത്തിയിരിക്കുകയാണ്. പദ്മജ വേണുഗോപാല്‍ കോണ്‍ഗ്രസ് വിട്ട് ബിജെപിയിലെത്തിയതിനെ പ്രശംസിച്ച് രംഗത്തെത്തിയിരിക്കുകയാണ് നടന്‍ ഹരീഷ് പേരടി.
സോഷ്യല്‍മീഡിയയിലൂടെയായിരുന്നു പ്രതികരണം. ഈ വനിതാദിനത്തിന് ഇതിലും വലിയ മാതൃകയില്ല എന്നും ഒരു സ്ത്രി ഒരുപാട് അവഗണനകളെ മറികടന്ന് അവര്‍ക്കിഷ്ടമുള്ള സ്ഥലത്തേക്ക് ഒറ്റക്ക് നടന്നുനീങ്ങുന്നുവെന്നും ഹരീഷ് പേരടി സോഷ്യല്‍മീഡിയയില്‍ കുറിച്ചു.
വനിതാദിനാശംസകള്‍ നേര്‍ന്നുകൊണ്ടാണ് താരത്തിന്റെ കുറിപ്പ്. മാര്‍ച്ച്-8.. ലോകവനിതാദിനം..നിങ്ങള്‍ക്ക് രാഷ്ട്രീയമായ യോജിപ്പും വിയോജിപ്പുമുണ്ടാവാം..പക്ഷെ ഒരു സ്ത്രി ഒരുപാട് അവഗണനകളെ മറികടന്ന് അവര്‍ക്കിഷ്ടമുള്ള സ്ഥലത്തേക്ക് ഒറ്റക്ക് നടന്നുനീങ്ങുന്നു…ഈ വനിതാദിനത്തിന് ഇതിലും വലിയ മാതൃകയില്ല..എല്ലാവര്‍ക്കും ലോക വനിതാദിനാശംസകള്‍.- ഹരീഷ് പേരടി കുറിച്ചു.
കഴിഞ്ഞദിവസമാണ് പദ്മജ വേണുഗോപാല്‍ ബിജെപി അംഗത്വം സ്വീകരിച്ചത്. പ്രകാശ് ജാവഡേക്കര്‍ ഉള്‍പ്പെടെയുള്ള നേതാക്കളുടെ സാന്നിധ്യത്തിലായിരുന്നു പാര്‍ട്ടി പ്രവേശം.
