കോഴിക്കോട്: 10 വര്‍ഷം നീണ്ട ഭര്‍തൃവീട്ടിലെ പീഡനത്തെ തുടര്‍ന്ന് ജീവിതം അവസാനിപ്പിച്ച ഷബ്‌ന നോവായിരിക്കുകയാണ്. മകളുടെ വിദ്യാഭ്യാസം മുടങ്ങുമെന്ന പേടിയിലാണ് എല്ലാം സഹിച്ച് നിന്നതെന്നും ഷബ്നയുടെ ഉമ്മ പറയുന്നു.
ഒരു സമാധാനവും അവര്‍ നല്‍കിയിട്ടില്ല. തിങ്കളാഴ്ച്ച ഉച്ചയ്ക്ക് അവളെ കൊണ്ടുവിട്ട ശേഷം അവള്‍ കടുത്ത മാനസികവേദന അനുഭവിച്ചു. എല്ലാം അവസാനിപ്പിച്ചിട്ട് വരാന്‍ പറഞ്ഞെങ്കിലും മകളുടെ വിദ്യാഭ്യാസം മുടങ്ങുമെന്ന ആശങ്കയിലാണ് ഷബ്‌ന അവിടെ പിടിച്ചു നിന്നത്.
അവര്‍ നാലുപേരും കൂടി എന്റെ മകളെ അടിച്ചു പീഡിപ്പിച്ചു. അവള്‍ ചെറിയ പെണ്‍കുട്ടിയാണ്, സമാധാനം കൊടുക്കണം എന്ന് പലപ്പോഴും താനവരോട് പറഞ്ഞിട്ടുണ്ട്. വീട്ടുജോലി ചെയ്യുന്നത് പോര എന്നും പറഞ്ഞാണ് പീഡനം. മരിക്കും മുന്‍പ് വിദേശത്തുള്ള ഭര്‍ത്താവ് ഹബീബിനോടാണ് അവള്‍ സംസാരിച്ചത്. ഹബീബും യാതൊരു തരത്തിലുള്ള പിന്തുണയും നല്‍കിയില്ല.
4 വര്‍ഷം മുന്‍പും ഇവരുടെ പീഡനം സഹിക്കവയ്യാതെ ഷബ്‌ന ജീവനൊടുക്കാന്‍ ശ്രമിച്ചിരുന്നു. അന്ന് തീ കൊളുത്തിയാണ് മരിക്കാനൊരുങ്ങിയത്. അന്ന് ഒരു വിധത്തില്‍ രക്ഷപ്പെട്ടു, തിരിച്ചുവീട്ടിലേക്ക് വരാന്‍ ആവശ്യപ്പെട്ടെങ്കിലും മകളുടെ വിദ്യാഭ്യാസം മുടങ്ങുമെന്ന പേടിയായിരുന്നു അവള്‍ക്ക്. അവര്‍ക്ക് എന്റെ മോളെ രക്ഷിക്കാന്‍ ആവശ്യത്തിനു സമയമുണ്ടായിരുന്നു, പള്ളിക്കമ്മറ്റിയില്‍ നിന്നും ആളുകള്‍ വന്നപ്പോള്‍ ആണ് ഷബ്‌ന വാതിലടച്ച് ജീവനൊടുക്കിയത്.
Discussion about this post