തൃശ്ശൂര്‍: കൂട്ടത്തോടെ ഇറങ്ങിയ കാട്ടാനകള്‍ വാല്‍പ്പാറയില്‍ സ്‌കൂള്‍ തകര്‍ത്തു. വാല്‍പ്പാറ പച്ചമലൈ എസ്റ്റേറ്റിലാണ് സംഭവം. പച്ചമലൈ എസ്റ്റേറ്റിലെ സ്‌കൂളിനു നേരെയാണ് കാട്ടാനകൂട്ടത്തിന്റെ ആക്രമണം ഉണ്ടായത്.
കൂട്ടമായി കാടിറങ്ങിയെത്തിയ കാട്ടാനകള്‍ സ്‌കൂളിന്റെ ഓഫീസ് മുറിയുടെ ചുവര്‍ പൂര്‍ണമായും തകര്‍ത്തു. പിന്നീട് ഓഫീസിലെ കംപ്യൂട്ടറുകള്‍, ടിവി, കസേര, മേശ, പാത്രങ്ങള്‍ എന്നിവയും മറ്റു വസ്തുക്കളും തകര്‍ത്തു.
15 ആനകള്‍ അടങ്ങുന്ന കൂട്ടമാണ് ആക്രമണം നടത്തിയത്. സ്‌കൂളിലെ ഓഫീസിലെ അലമാരകളും മറ്റു വസ്തുക്കളെല്ലാം പൂര്‍ണമായും തകര്‍ത്തു. കുട്ടികളുടെ പുസ്തകങ്ങളും ഓഫീസിലെ മറ്റു ഫയലുകളുമെല്ലാം തന്നെ നശിപ്പിച്ച നിലയിലാണ്.
ഓഫീസിലുണ്ടായിരുന്ന എല്ലാ സാധനങ്ങളും കാട്ടാനകള്‍ തകര്‍ത്തിട്ടുണ്ട്. സ്‌കൂളിന്റെ ഒരു ഭാഗം കാട്ടാനകള്‍ തകര്‍ത്തതോടെ കുട്ടികളും അധ്യാപകരും ഭീതിയിലായിരിക്കുകയാണ്.