തൃശ്ശൂര്‍: കഴിഞ്ഞ ദിവസമാണ് നടനും ബിജെപി നേതാവുമായ സുരേഷ് ഗോപി ‘ഗരുഡന്‍’ സിനിമ പ്രദര്‍ശിപ്പിക്കുന്ന തിയറ്ററുകളിലെത്തിയിരുന്നു. സന്ദര്‍ശനത്തിനിടെ തന്നെ ആലിംഗനം ചെയ്ത് ചുംബിക്കാനെത്തിയ ആരാധകനെ തള്ളി മാറ്റുന്ന താരത്തിന്റെ വീഡിയോ സമൂഹമാധ്യമങ്ങളില്‍ വൈറലായിരുന്നു. വീഡിയോ വൈറലായതോടെ വ്യാപകമായ വിമര്‍ശനമാണ് അദ്ദേഹത്തിനു നേരെ ഉയര്‍ന്നത്.
സ്ത്രീകളായ ആരാധകരെ മാത്രമേ അദ്ദേഹം ആലിംഗനം ചെയ്യൂ എന്നും ഇതാണ് സുരേഷ് ഗോപിയുടെ കപട സ്വഭാവമെന്നുമൊക്കെയായിരുന്നു ആരോപണം. ഇപ്പോള്‍ ആ സംഭവത്തില്‍ വിശദീകരണവുമായി എത്തിയിരിക്കുകയാണ് സുരേഷ് ഗോപി ആരാധകര്‍.
കാലിന്റെ തള്ളവിരലിലുണ്ടായ മുറിവ് കെട്ടിവച്ചായിരുന്നു സുരേഷ് ഗോപി തിയറ്റര്‍ സന്ദര്‍ശനത്തിനെത്തിയത്. പെട്ടെന്നു തന്റെ നേരെ വന്ന ആരാധകന്‍ മുറിവില്‍ ചവിട്ടാതിരിക്കാന്‍ വേണ്ടിയാണ് സുരേഷ് ഗോപി അദ്ദേഹത്തെ തള്ളി മാറ്റിയത്. പിന്നീട് തന്റെ കാലിലെ മുറിവിനെക്കുറിച്ച് അദ്ദേഹം ആരാധകനോട് പറയുന്നുമുണ്ട്.
”സിനിമ വലിയ വിജയമായി പോകുമ്പോള്‍ ഇങ്ങനെ ഉള്ള കാര്യങ്ങള്‍ സംസാരിക്കേണ്ടെന്ന് വച്ചതാ. പക്ഷേ ഈ വീഡിയോ മുഴുവന്‍ കാണാതെ കിടന്നു സുരേഷേട്ടനെ ട്രോളുന്ന എല്ലാവര്‍ക്കും ഇതു സമര്‍പ്പിക്കുന്നു. നിങ്ങള്‍ മൊത്തം ഒന്ന് കണ്ടേ, ഒപ്പം സുരേഷേട്ടന്റെ കാലുകളില്‍ കൂടെ ഒന്ന് നോക്കിക്കേ. ശേഷം സുരേഷേട്ടന്‍ പുള്ളിയോടു പറയുന്നത് കൂടെ ഒന്ന് കാണൂ, എന്നിട്ടും മനസ്സിലാക്കാന്‍ പറ്റാത്തവര്‍ ഇനി മനസ്സിലാക്കേണ്ട.”സുരേഷ് ഗോപി ഫാന്‍സ് വീഡിയോ പങ്കുവച്ച് കുറിച്ചു.
Discussion about this post