വര്‍ക്കല: വാടക കുടിശിക മൂലം വീട് ഒഴിയേണ്ടതിന്റെ വേദനയിലായിരുന്ന ലോട്ടറിക്കച്ചവടക്കാരന്‍ അനിലിനെ തേടിയെത്തി ഭാഗ്യദേവത. വര്‍ക്കല പുല്ലാന്നിക്കോട് കൊച്ചുവിള വീട്ടില്‍ ആര്‍.അനില്‍കുമാറിന് വിന്‍വിന്‍ ലോട്ടറിയുടെ (wt465665) ഒന്നാം സമ്മാനമായ 75 ലക്ഷം രൂപയാണ് ലഭിച്ചത്.
പ്രവാസിയായിരുന്ന അനില്‍ ആരോഗ്യപ്രശ്‌നങ്ങള്‍ മൂലം ഗള്‍ഫിലെ ജോലിവിട്ടു നാട്ടില്‍ മടങ്ങിയെത്തി ലോട്ടറി കച്ചവടം ചെയ്തുവരികയായിരുന്നു. റാസല്‍ഖൈമയിലെ കെമിക്കല്‍ കമ്പനിയില്‍ മൂന്നുവര്‍ഷത്തോളമാണ് അനില്‍ ജോലിചെയ്തിരുന്നത്.
ഒരുവര്‍ഷം മുന്‍പാണ് നാട്ടിലേക്ക് മടങ്ങിയെത്തിയത്. എന്നാല്‍ തിരികെ എത്തുമ്പോള്‍ തന്റെ കൈയ്യില്‍ സമ്പാദ്യമൊന്നുമുണ്ടായിരുന്നില്ലെന്ന് അനില്‍കുമാര്‍ പറയുന്നു. ഫീസിനു നിവൃത്തിയില്ലാതെ ഇളയമകളുടെ ബിരുദ പഠനം പോലും പാതിവഴിയില്‍ മുടങ്ങിയിരുന്നു.
വാടക കുടിശിക മൂലം വീട് ഒഴിയേണ്ട സാഹചര്യത്തിലാണ് അമ്പത്തിരണ്ടുകാരനെ നേടി ഭാഗ്യമെത്തിയത്. മറ്റൊരു കച്ചവടക്കാരന്റെ കയ്യില്‍ നിന്നു വാങ്ങിയ മൂന്നു ടിക്കറ്റുകളിലൊന്നിനാണു സമ്മാനം. മറ്റു ടിക്കറ്റുകള്‍ക്ക് പ്രോത്സാഹാന സമ്മാനമായി 8000 രൂപ വീതവും ലഭിച്ചു.പ്രഭുലയാണ് ഭാര്യ. കാവ്യ, ശ്രീലക്ഷ്മി എന്നിവര്‍ മക്കളും.
Discussion about this post