ചേര്‍ത്തല: വായനശാല ഉദ്ഘാടന പരിപാടി അലങ്കോലപ്പെടുത്താന്‍ കൊടുവാളുമായി എത്തിയ ആര്‍എസ്എസ് പ്രവര്‍ത്തകനെ എടുത്തിട്ട് അടിച്ച് പഞ്ഞിക്കിട്ട് നാട്ടുകാര്‍. ശേഷം ഇയാളെ പോലീസില്‍ ഏല്‍പ്പിച്ചു. ആര്‍എസ്എസ് പ്രവര്‍ത്തകന്റെ ആക്രമണത്തില്‍ വായനശാലാ പ്രവര്‍ത്തകന് പരിക്കേറ്റിരുന്നു. ശേഷമാണ് ആര്‍എസ്എസ് പ്രവര്‍ത്തകനെ എടുത്തിട്ടടിച്ചത്.
കരുവ ദൃശ്യയുടെ വായനശാല ഉദ്ഘാടന പരിപാടിക്കിടെയാണ് സംഭവം. നിരവധി ക്രിമിനല്‍ കേസുകളിലെ പ്രതി ചേര്‍ത്തല മുനിസിപ്പല്‍ ഇരുപതാം വാര്‍ഡില്‍ കാടുവെട്ടിപ്പറമ്പില്‍ മണ്ണെണ്ണ മേനോജ് എന്നറിയപ്പെടുന്ന മനോജ്(41) ആണ് പരിപാടിക്കിടെ അക്രമം അഴിച്ചുവിട്ടത്. പരിപാടി അലങ്കോലമാക്കാനായി എത്തിയ ഇയാള്‍ യാതൊരു കാരണവുംകൂടാതെ അരയില്‍ ഒളിപ്പിച്ച് വച്ചിരുന്ന കൊടുവാള്‍ വീശുകയായിരുന്നു.
ആക്രമണത്തില്‍ ലൈബ്രറി ജീവനക്കാരനായ പ്രതീഷിന്റെ കൈകാലുകള്‍ക്ക് പരിക്കേറ്റു. ഇതോടെ നാട്ടുകാര്‍ മനോജിനെ കീഴ്‌പ്പെടുത്തുകയും വാള്‍ പിടിച്ചുവാങ്ങി പോലീസിന് കൈമാറുകയും ചെയ്തു. പ്രതീഷിനെ താലൂക്ക് ആശുപത്രിയിലും മനോജിനെ ആലപ്പുഴ മെഡിക്കല്‍ കോളേജ് ആശുപത്രിയിലും പ്രവേശിപ്പിച്ചു.
Discussion about this post