കായംകുളം: 4.5 ഗ്രാം എംഡിഎംഎയുമായി ഇരുപത്തിമൂന്നുകാരന്‍ പിടിയില്‍. എരുവ കണ്ണാട്ട് കിഴക്കതില്‍വീട്ടില്‍ വിജിത് ആണ് പിടിയിലായത്. പോലീസിന് ലഭിച്ച രഹസ്യവിവരത്തിന്റെ അടിസ്ഥനത്തില്‍ നര്‍ക്കോട്ടിക് സെല്‍ ഡി.വൈ.എസ്.പി സജിമോന്റെയും കായംകുളം ഡി.വൈ.എസ്.പി അജയ് നാഥിന്റേയും നേതൃത്വത്തിലുള്ള സംഘമാണ് പ്രതിയെ പിടികൂടിയത്.
കര്‍ണാടകയില്‍ നിന്നുമാണ് ഇയാള്‍ മയക്കുമരുന്ന് കായംകുളത്ത് എത്തിക്കുന്നത്. ശേഷം ചെറിയ പൊതികളാക്കിയാണ് ഇയാള്‍ മയക്കുമരുന്ന് വില്‍പ്പന നടത്തിയിരുന്നത്. മാസങ്ങളായി മയക്കുമരുന്ന് വില്‍പ്പന നടത്തിയിരുന്നെങ്കിലും ആദ്യമായാണ് വിജിത് പോലീസിന്റെ വലയിലാകുന്നത്.
കാര്‍ത്തികപ്പള്ളി, മുതുകുളം, ചിങ്ങോലി, എരുവ ഭാഗത്ത് ചെറുപ്പക്കാര്‍ക്കും കുട്ടികള്‍ക്കും മയക്കുമരുന്ന് എത്തിച്ചു കൊടുക്കുന്നത് ഇയാളാണെന്ന് പോലീസ് കണ്ടെത്തി. ഇവരുടെ വീട്ടില്‍ നിന്ന് ധാരാളം കുട്ടികളും ചെറുപ്പക്കാരും മയക്കുമരുന്ന് വാങ്ങുന്നതായി പരാതിയുണ്ട്.
പ്രതിയെ കൂടുതല്‍ ചോദ്യം ചെയ്തതില്‍ നിന്നും ബാംഗ്ലൂരില്‍ നിന്നും നേരിട്ട് വാങ്ങി കായംകുളം, ഹരിപ്പാട്, തൃക്കുന്നപ്പുഴ മേഖലകളില്‍ വില്‍ക്കുകയാണെന്ന് മനസ്സിലായി. ഗ്രാമിന് മൂവായിരം മുതല്‍ അയ്യായ്യിരം രൂപയ്ക്കാണ് വില്‍ക്കുന്നതെന്നും പോലീസിനോട് പറഞ്ഞു. കഴിഞ്ഞ കുറച്ച് മാസങ്ങളായി ജില്ലാ ആന്റി നര്‍ക്കോട്ടിക് ടീം ഇയാളെ നിരിക്ഷിച്ചു വരികയായിരുന്നു.