കുറ്റ്യാടി: കാണാതായ കോളേജ് വിദ്യാര്‍ഥിനിയെ തൊട്ടില്‍പ്പാലം കുണ്ടുതോടില്‍ വീടിനുള്ളില്‍ പൂട്ടിയിട്ട നിലയില്‍ കണ്ടെത്തി. കുണ്ടുതോടിലെ ആളില്ലാത്ത വീട്ടില്‍നിന്ന് തൊട്ടില്‍പ്പാലം പോലീസെത്തിയാണ് പെണ്‍കുട്ടിയെ രക്ഷിച്ചത്. കുണ്ടുതോടിലെ ഉണ്ണിയത്താംകണ്ടി വീട്ടില്‍ ജുനൈദ് അലി(25)യുടെ വീടിന്റെ മുകള്‍നിലയിലെ മുറിയിലാണ് പെണ്‍കുട്ടിയെ കണ്ടെത്തിയത്.
കോഴിക്കോട്ടെ കോളേജില്‍ പഠിക്കുന്ന പെണ്‍കുട്ടിയെ ബുധനാഴ്ചമുതല്‍ രക്ഷിതാക്കള്‍ ഫോണില്‍ ബന്ധപ്പെടാന്‍ ശ്രമിച്ചെങ്കിലും കിട്ടിയിരുന്നില്ല. തുടര്‍ന്ന് കൂട്ടുകാരികളുമായി ബന്ധപ്പെട്ടപ്പോഴാണ് ഹോസ്റ്റലില്‍ നിന്ന് ബുധനാഴ്ച വൈകുന്നേരം ജുനൈദ് കൂട്ടിക്കൊണ്ടുപോയതായി മനസ്സിലാക്കിയത്. വ്യാഴാഴ്ച രാവിലെ മാതാപിതാക്കള്‍ പോലീസില്‍ പരാതി നല്‍കി.
സൈബര്‍ സെല്ലിന്റെ സഹായത്തോടെ പോലീസ് കുട്ടിയുടെ ഫോണ്‍ ട്രാക്ക് ചെയ്ത് നടത്തിയ അന്വേഷണത്തിലാണ് കുണ്ടുതോട് ഭാഗത്തുണ്ടെന്ന് മനസ്സിലായത്. നാട്ടുകാരുടെ സഹായത്തോടെ ജുനൈദിന്റെ വീടിന്റെ പൂട്ടുതകര്‍ത്താണ് പോലീസ് പെണ്‍കുട്ടിയെ മോചിപ്പിച്ചത്. വീടിന്റെ രണ്ടാംനിലയിലെ മുറിയിലാണ് പെണ്‍കുട്ടിയെ പൂട്ടിയിട്ടിരുന്നത്. വിവസ്ത്രയാക്കിയ നിലയിലായിരുന്നു. ബന്ധുക്കളെത്തി വൈദ്യപരിശോധനയ്ക്കായി പെണ്‍കുട്ടിയെ ആശുപത്രിയിലേക്കു മാറ്റി.
മുറിയില്‍നിന്ന് എംഡിഎംഎയ്ക്കുപുറമേ മദ്യക്കുപ്പികളും കണ്ടെത്തി. പോലീസെത്തുന്നതിന് ഒരുമണിക്കൂര്‍ മുമ്പ് ജുനൈദ് അലി മുറി പൂട്ടി പുറത്തുപോയതായാണ് വിവരം. എംഡിഎംഎ പിടികൂടിയ സംഭവത്തില്‍ പോലീസ് കേസെടുത്തിട്ടുണ്ട്. പെണ്‍കുട്ടിയുടെ മൊഴി ലഭിച്ചാല്‍ കേസ് രജിസ്റ്റര്‍ ചെയ്ത് അന്വേഷണം ആരംഭിക്കും.
പെണ്‍കുട്ടിയുടെ ആരോഗ്യനില തൃപ്തികരമാണെന്നും തൊട്ടില്‍പ്പാലം പോലീസ് അറിയിച്ചു. രണ്ടുമാസംമുമ്പാണ് യുവാവിന്റെ മാതാപിതാക്കള്‍ മകളുടെ പ്രസവ ആവശ്യവുമായി ബന്ധപ്പെട്ട് വിദേശത്തേക്കു പോയത്. തുടര്‍ന്ന് യുവാവ് വീട്ടില്‍ ഒറ്റയ്ക്കായിരുന്നു താമസം.