തിരുവനന്തപുരം: വിവാഹത്തിന് തൊട്ടുമുമ്പ് വധു സുഹൃത്തിനൊപ്പം ഒളിച്ചോടി. തിരുവനന്തപുരത്താണ് സംഭവം. വടശ്ശേരിക്കോണം സ്വദേശിയായ യുവതിയാണ് ഒളിച്ചോടിയത്. ഇതോടെ വിവാഹം മുടങ്ങി.
കല്ലമ്പലത്താണ് സംഭവം. വിവാഹദിവസം ഓഡിറ്റോറിയത്തില് അതിഥികളും ബന്ധുക്കളും എത്തിയിട്ടും മുഹൂര്ത്തത്തിനു വധുവിനെ കാണാതായതോടെ നടത്തിയ അന്വേഷണത്തിലാണ് സുഹൃത്തിനൊപ്പം യുവതി ഒളിച്ചോടിയതായി അറിഞ്ഞത്.
ഇടവ സ്വദേശിയായ യുവാവുമായി ആറ് മാസം മുന്പാണ് യുവതിയുടെ വിവാഹം നിശ്ചയിച്ചത്. വിവാഹ ദിവസം ബ്യൂട്ടി പാര്ലറിലേക്കെന്നു പറഞ്ഞായിരുന്നു യുവതി പോയത്. അവിടെ നിന്നും സുഹൃത്തിനൊപ്പം ഒളിച്ചോടുകയായിരുന്നു.
മുഹൂര്ത്തത്തിന് സമയമായിട്ടും യുവതിയെ കാണാതായതോടെ മാതാപിതാക്കള് കുഴഞ്ഞു വീണു. യുവാവും ബന്ധുക്കളും സംയമനത്തോടെ ഇടപെട്ടതിനാല് കൂടുതല് പ്രശ്നങ്ങളില്ലാതെ കാര്യങ്ങള് ശാന്തമായി അവസാനിച്ചു.
യുവതിയെ യുവാവിനൊപ്പം പോകാന് ബന്ധുക്കള് സമ്മതിക്കുകയായിരുന്നു. എന്നാല് അതിഥികള്ക്കായി ഒരുക്കിയ സദ്യയും വിവാഹത്തിനായി ഇരു കൂട്ടരും മുടക്കിയ ലക്ഷങ്ങളും പാഴായി.
Discussion about this post