കൊല്ലം: കരുനാഗപ്പള്ളിയില്‍ തിയേറ്ററിനുള്ളില്‍ പ്രായപൂര്‍ത്തിയാകാത്ത പെണ്‍കുട്ടിക്ക് നേരെ ലൈംഗികാതിക്രമം. സംഭവത്തില്‍ തഴവ തെക്കുമുറി പടിഞ്ഞാറ് സ്വദേശി അരവിന്ദ് (23) പിടിയിലായി.
പുതിയകാവിലുള്ള തിയേറ്ററില്‍ കുടുംബത്തോടൊപ്പം സിനിമ കാണാന്‍ എത്തിയതായിരുന്നു പെണ്‍കുട്ടി. ഈസമയം പെണ്‍കുട്ടിയുടെ സീറ്റിന്റെ പുറകിലിരുന്ന പ്രതി കുട്ടിയെ കടന്നു പിടിക്കുകയായിരുന്നു. പെണ്‍കുട്ടി ബഹളം വെച്ചതിനെ തുടര്‍ന്ന് അച്ഛന്‍ പ്രതിയെ പിടികൂടാന്‍ ശ്രമിച്ചെങ്കിലും മര്‍ദ്ദിച്ച ശേഷം തിയേറ്ററില്‍ നിന്ന് കടന്നുകളഞ്ഞു.
തുടര്‍ന്ന് കരുനാഗപ്പള്ളി പോലീസില്‍ പെണ്‍കുട്ടി നല്‍കിയ പരാതിയുടെ അടിസ്ഥാനത്തിലാണ് ഇരുപത്തിമൂന്നുകാരനെതിരെ കേസെടുത്തത്. പിടിയിലായ അരവിന്ദ് നേരത്തേയും പോക്‌സോ കേസിലും മോഷണ കേസിലും പ്രതിയാണെന്നാണ് റിപ്പോര്‍ട്ട്.