കണ്ണൂര്‍: ലോക്കോ പൈലറ്റിനെ ലോക്കോ റണ്ണിങ് റൂമില്‍ മരിച്ച നിലയില്‍ കണ്ടെത്തി. കണ്ണൂര്‍ റെയില്‍വേ സ്റ്റേഷനിലാണ് സംഭവം. കൊയിലാണ്ടി സ്വദേശി കെ.കെ.ഭാസ്‌കരന്‍ ആണ് മരിച്ചത്. ഹൃദയാഘാതമാണ് മരണകാരണമെന്നു സംശയിക്കുന്നു.
അമ്പത്തിരണ്ട് വയസ്സായിരുന്നു. കഴിഞ്ഞ ദിവസം രാത്രി പതിനൊന്നരയോടെയാണ് ആലപ്പുഴ കണ്ണൂര്‍ എക്‌സിക്യൂട്ടീവ് എക്‌സ്പ്രസിന്റെ ലോക്കോ പൈലറ്റ് ആയി ഭാസ്‌കരന്‍ കണ്ണൂരിലെത്തിയത്.
ഇന്ന് രാവിലെ 5.10നു കണ്ണൂരില്‍ നിന്നും പുറപ്പെടുന്ന ആലപ്പുഴ-കണ്ണൂര്‍ എക്‌സിക്യൂട്ടീവ് എക്‌സ്പ്രസില്‍ ലോക്കോ പൈലറ്റ് ആയി പോകേണ്ടതായിരുന്നു. സ്റ്റേഷനില് നിന്നും ട്രെയിന്‍ പുറപ്പെടുന്നതിന് ഒരു മണിക്കൂര്‍ മുമ്പാണ് ജീവനക്കാര്‍ ഭാസ്‌കരനെ വിളിക്കാനായി ചെന്നത്.
അപ്പോഴാണ് ലോക്കോ റണ്ണിങ് റൂമില്‍ അദ്ദേഹത്തെ അനക്കമില്ലാത്ത നിലയില്‍ കണ്ടത്. ഉടന്‍ സമീപത്തെ സ്വകാര്യ ആശുപത്രിയില്‍ എത്തിച്ചെങ്കിലും മരിച്ചിരുന്നു. തുടര്‍ന്ന് ജില്ലാ ആശുപത്രിയില്‍ ഇന്‍ക്വസ്റ്റ് പൂര്‍ത്തിയാക്കി പോസ്റ്റ്‌മോര്‍ട്ടത്തിന് പരിയാരത്തേക്ക് കൊണ്ടുപോയി.