പത്തനംതിട്ട : യുവാവിനെ വീട്ടിനുള്ളില്‍ കൊല്ലപ്പെട്ട നിലയില്‍ കണ്ടെത്തി. പത്തനംതിട്ടയിലാണ് സംഭവം. വേങ്ങത്തടത്തില്‍ ജോബിനെ ആണ് മരിച്ച നിലയില്‍ കണ്ടെത്തിയത്. മുപ്പത്തിയെട്ട് വയസ്സായിരുന്നു. സംഭവത്തില്‍ പിതാവിനെയും സുഹൃത്തിനെയും പോലീസ് കസ്റ്റഡിയിലെടുത്തു.
കഴിഞ്ഞ ദിവസം രാത്രിയില്‍ പിതാവിനും സഹോദരനുമൊപ്പം ഇയാള്‍ മദ്യപിച്ചിരുന്നതായി പൊലീസിന് വിവരം ലഭിച്ചു. മദ്യപാനത്തിനിടെയുണ്ടായ തര്‍ക്കമാണ് കൊലപാതകത്തില്‍ കലാശിച്ചതെന്നാണ് പൊലീസിന്റെ പ്രാഥമിക നിഗമനം.
ജോബിന്റെ പിതാവ് ജോണ്‍സണ്‍, സുഹൃത്ത് എന്നിവരെയാണ് പൊലീസ് കസ്റ്റഡിയിലെടുത്തത്. സംഭവത്തിന് പിന്നാലെ ജോബിന്റെ സഹോദരന്‍ ഒളിവിലാണ്. സംഭവസമയത്ത് സഹോദരന്റെ വീട്ടിലായിരുന്നു അമ്മ.
also read: നടി നൂറിൻ ഷെരീഫിനും തിരക്കഥാകൃത്ത് ഫഹീം സഫറിനും പ്രണയസാഫല്യം; വിവാഹം തിരുവനന്തപുരത്ത്
രാവിലെ വീട്ടില്‍ തിരിച്ചെത്തിയപ്പോഴാണ് മകനെ മരിച്ച നിലയില്‍ കണ്ടെത്തിയത്. വീടിനുള്ളില്‍ തറയില്‍ മലര്‍ന്നു കിടക്കുന്ന നിലയിലാണ് മൃതദേഹം കണ്ടെത്തിയത്. ശരീരത്തില്‍ പലയിടത്തും മര്‍ദ്ദനമേറ്റ പാടുകളുണ്ട്.
കൂടാതെ തലയില്‍ നിന്നടക്കം ചോര വാര്‍ന്ന നിലയിലാണ്. സംഭവത്തില്‍ അടുത്ത ബന്ധുക്കളെ പൊലീസ് ചോദ്യം ചെയ്തിട്ടുണ്ട്. പോലീസ് അന്വേഷണം ആരംഭിച്ചിരിക്കുകയാണ്.