തിരുവനന്തപുരം: മദ്യപിക്കുന്നതിനിടെ എത്തിയ പൊലീസിനെ കണ്ട് ഭയന്നോടിയ അമ്പതുകാരന്‍ പുരയിടത്തില്‍ മരിച്ച നിലയില്‍. തിരുവനന്തപുരത്താണ് സംഭവം. തമ്പുരാന്‍മുക്ക് കൈപ്പള്ളി നഗര്‍ താര 226ല്‍ ഹരിപ്രകാശ് ആണ് മരിച്ചത്.
മൃതദേഹത്തിന് ഒരു ദിവസത്തെ പഴക്കമുണ്ടെന്ന് പോലീസ് കണ്ടെത്തി. സമീപത്തെ വീടിന്റെ പിന്‍വശത്തുള്ള പുരയിടത്തിലാണ് ഹരിപ്രകാശിന്റെ മൃതദേഹം കിടന്നത്. നിര്‍ത്താതെയുള്ള വളര്‍ത്തു നായയുടെ കുര കേട്ട് നോക്കിയപ്പോള്‍ ഹരിപ്രകാശിന്റെ അമ്മ അന്നമ്മയാണ് മൃതദേഹം കണ്ടത്.
ചൊവ്വാഴ്ച രാത്രി തമ്പുരാന്‍മുക്കിലെ ആളൊഴിഞ്ഞ വീടിന്റെ മുകളിലത്തെ നിലയില്‍ രണ്ട് പേര്‍ ഇരുന്നു മദ്യപിക്കുന്നതായി നാട്ടുകാര്‍ ഉടമയെ അറിയിച്ചിരുന്നു. ഉടമ ഇക്കാര്യം പൊലീസിനേയും അറിയിച്ചു. വിവരമറിഞ്ഞ് സ്ഥലത്തെത്തിയ പോലീസിനെ കണ്ട് ഹരിപ്രകാശ് ഓടി രക്ഷപ്പെടുകയായിരുന്നു.
also read: ചരിത്രത്തിലേക്ക്‌ കുതിക്കാൻ ഇന്ത്യ; ചന്ദ്രയാൻ 3 വിക്ഷേപണം ഇന്ന്
തുടര്‍ന്ന് സമീപത്തെ മതിലുചാടി കടക്കാന്‍ ശ്രമിക്കുന്നതിനിടെ കാല്‍തെറ്റി വീണ് മരിച്ചതാകാമെന്നാണ് പ്രാഥമിക നിഗമനം. ഇയാളുടെ തലയ്ക്ക് പരിക്കേറ്റതിന്റെ പാടുകളുണ്ട്. പരിശോധനാ ഫലം വന്ന ശേഷമേ മരണ കാരണം കൃത്യമായി പറയാന്‍ സാധിക്കു എന്ന് പൊലീസ് വ്യക്തമാക്കി.
