മൂവാറ്റുപുഴ; പ്രണയാഭ്യര്‍ത്ഥന നിരസിച്ച യുവതിയെ തോക്കുചൂണ്ടി ഭീഷണിപ്പെടുത്തി തട്ടിക്കൊണ്ടുപോകാന്‍ ശ്രമിച്ച യുവാവ് അറസ്റ്റില്‍. ഇടുക്കിയാണ് സംഭവം. തലക്കോട് മലയന്‍കുന്നേല്‍ രാഹുല്‍ (26) ആണ് അറസ്റ്റിലായത്.
മൂവാറ്റുപുഴ കോടതി വളപ്പിലുള്ള അഭിഭാഷക ഓഫിസില്‍ ക്ലര്‍ക്കായി ജോലി ചെയ്യുന്ന യുവതിയെയാണ് ഭീഷണിപ്പെടുത്തിയത്. യുവതി നല്‍കിയ പരാതിയെ തുടര്‍ന്നാണ് പോലീസ് രാഹുലിനെ അറസ്റ്റ് ചെയ്ത്.
also read; യൂ ട്യൂബര്‍ ‘തൊപ്പി’ അറസ്റ്റില്‍; കസ്റ്റഡിയില്‍ എടുത്തത് വാതില്‍ ചവിട്ടിപ്പൊളിച്ച്
പിന്നാലെ യുവാവില്‍ നിന്നും എയര്‍ഗണ്‍ പിടിച്ചെടുത്തു. ബുധനാഴ്ച വൈകിട്ടായിരുന്നു സംഭവം. യുവതി മാത്രം ഓഫിസില്‍ ഉള്ളപ്പോഴാണ് രാഹുല്‍ എത്തിയത്. തുടര്‍ന്ന് തോക്കുചൂണ്ടി ഭീഷണിപ്പെടുത്തുകയായിരുന്നു.
ഒരുമിച്ച് ജീവിക്കാന്‍ തയാറായില്ലെങ്കില്‍ യുവതിയേയും ബന്ധുക്കളേയും കൊല്ലുമെന്നായിരുന്നു യുവാവിന്റെ ഭീഷണി. പിന്നീട് യുവതിയെ ഓഫിസിന് പുറത്തെത്തിച്ച് കാറില്‍ കയറ്റി. എന്നാല്‍ യുവതി ബഹളംവെച്ച് കാറില്‍ നിന്ന് പുറത്തിറങ്ങി രക്ഷപ്പെടുകയായിരുന്നു.
ബഹളം കേട്ട് ആളുകള്‍ കൂടിയതോടെ രാഹുല്‍ കടന്നുകളഞ്ഞു. തുടര്‍ന്ന് യുവതി പോലീസില്‍ പരാതി നല്‍കുകയായിരുന്നു. ഇയാള്‍ മുന്‍പും ഭീഷണിയുമായി എത്തിയിട്ടുണ്ടെന്ന് യുവതി പറയുന്നു. വിവാഹത്തിന് സമ്മതിച്ചില്ലെങ്കില്‍ ആംബുലന്‍സ് ഇടിച്ച് അമ്മയേയും സഹോദരനേയും കൊലപ്പെടുത്തുമെന്ന് ഭീഷണിപ്പെടുത്തിയിട്ടുണ്ടെന്ന് യുവതി പറയുന്നു.
Discussion about this post