കൊച്ചി: നടനും മിമിക്രി കലാകാരനുമായ കൊല്ലം സുധിയുടെ മരണത്തിനിടയാക്കിയ വാഹനാപകടത്തില്‍ പരിക്കേറ്റ് ചികിത്സയില്‍ കഴിയുന്ന മിമിക്രി കലാകാരന്‍ മഹേഷ് കുഞ്ഞുമോന്റെ ഓപ്പറേഷന്‍ വിജയകരമായി പൂര്‍ത്തിയായി.
നടന്‍ ബിനീഷ് ബാസ്റ്റിനാണ് ആശുപത്രിയില്‍ നിന്നുള്ള ഇത് സംബന്ധിച്ച വിവരം പുറത്ത് വിട്ടത്. കൊച്ചിയിലെ സ്വകാര്യ ആശുപത്രിയില്‍ ചികിത്സയിലാണ് മഹേഷ്.
‘കൊല്ലം സുധി ചേട്ടന്റെ കൂടെ വാഹനാപകടത്തില്‍പ്പെട്ട, പ്രിയപ്പെട്ട മഹേഷ് കുഞ്ഞുമോന്റെ ഓപ്പറേഷന്‍ കഴിഞ്ഞു കുഴപ്പമൊന്നുമില്ല’- ബിനീഷ് ബാസ്റ്റിന്‍ കുറിച്ചു.
തിങ്കളാഴ്ച പുലര്‍ച്ചെ നാലരയോടെ തൃശ്ശൂര്‍ കയ്പ്പമംഗലം പനമ്പിക്കുന്നില്‍ വച്ചായിരുന്നു അപകടം. വടകരയില്‍ നിന്ന് പരിപാടി കഴിഞ്ഞ് തിരികെ തിരുവനന്തപുരത്തേക്ക് പോകുകയായിരുന്നു.
താരങ്ങള്‍ സഞ്ചരിച്ച കാര്‍ എതിരെ വന്ന പിക്കപ്പുമായി കൂട്ടിയിടിക്കുകയായിരുന്നു. ഗുരുതരമായി പരിക്കേറ്റ സുധിയെ കൊടുങ്ങല്ലൂര്‍ എ.ആര്‍ ആശുപത്രിയില്‍ എത്തിച്ചുവെങ്കിലും ജീവന്‍ രക്ഷിക്കാനായില്ല.
മഹേഷ് കുഞ്ഞുമോന് പുറമേ ഡ്രൈവര്‍ ഉല്ലാസ്, നടന്‍ ബിനു അടിമാലി എന്നിവരാണ് കാറിലുണ്ടായിരുന്നത്. ബിനു അടിമാലിയുടെ ആരോഗ്യനില മെച്ചപ്പെട്ടതിനെ തുടര്‍ന്ന് തീവ്രപരിചരണ വിഭാഗത്തില്‍ നിന്ന് മാറ്റി. എല്ലിന് പൊട്ടലേറ്റ ഉല്ലാസും ചികിത്സയില്‍ തുടരുകയാണ്.
Discussion about this post