തിരുവനന്തപുരം: പ്രണയാഭ്യർഥന നിരസിച്ച സ്‌കൂൾ വിദ്യാർത്ഥിനിയെ നടുറോഡിൽ വെച്ച് മർദ്ദിച്ച് യുവാവ്. വർക്കല വെട്ടൂർ സ്വദേശിനിയായ 16-കാരിയെയാണ് വർക്കല വിളഭാഗം സ്വദേശി കൃഷ്ണരാജ്(23) മർദിച്ചത്. പ്രതിയെ തിങ്കളാഴ്ച രാതി പോലീസ് കസ്റ്റഡിയിലെടുത്തു.
തിങ്കളാഴ്ച ഉച്ചയ്ക്ക് രണ്ടുമണിയോടെ വെട്ടൂർ ജങ്ഷനിൽ വെച്ചാായിരുന്നു സംഭവം. പെൺകുട്ടിയോട് നിരന്തരം പ്രണയാഭ്യർഥന നടത്തിയിരുന്ന കൃഷ്ണരാജ് പെൺകുട്ടിയെ ശല്യംചെയ്യുന്നത് പതിവായിരുന്നു. തിങ്കളാഴ്ച കടയ്ക്കാവൂരിലെ ട്യൂഷൻക്ലാസിൽനിന്ന് പെൺകുട്ടി ബസിൽ തിരികെ വീട്ടിലേക്ക് വരുമ്പോൾ യുവാവും കൂടെ കയറിയിരുന്നു,
തുടർന്ന് വിദ്യാർത്ഥിനിയുടെ സീറ്റിന് തൊട്ടടുത്തിരുന്ന് കൈയിൽ കയറിപിടിക്കുകയും പ്രണയാഭ്യർഥന നടത്തുകയുമായിരുന്നു. പെൺകുട്ടി യുവാവിന്റെ പ്രണയാഭ്യർഥന നിരസിക്കുകയായിരുന്നു. തുടർന്ന് വെട്ടൂർ ജങ്ഷനിൽ ബസ്സിറങ്ങി വീട്ടിലേക്ക് നടന്നുപോകുന്നതിനിടെ പ്രതി പെൺകുട്ടിയെ പിന്തുടരുകയും റോഡിൽ തടഞ്ഞുനിർത്തി മർദിക്കുകയുമായിരുന്നു.
പെൺകുട്ടിയുടെ തലയ്ക്കും ചെവിയ്ക്കുമാണ് അടിയേറ്റത്. കുട്ടി നിലവിളിച്ചതോടെ നാട്ടുകാർ ഓടിയെത്തിയെങ്കിലും യുവാവ് ഓടിരക്ഷപ്പെട്ടു. പിനന്ീട്, മൊബൈൽ ടവർ ലൊക്കേഷൻ കേന്ദ്രീകരിച്ച് നടത്തിയ അന്വേഷണത്തിൽ തിങ്കളാഴ്ച രാത്രിയാണ് പ്രതിയെ പോലീസ് കസ്റ്റഡിയിലെടുത്തത്. പോക്സോ വകുപ്പുകളടക്കം ചുമത്തി പ്രതിയുടെ അറസ്റ്റ് രേഖപ്പെടുത്തി. മർദനമേറ്റ പെൺകുട്ടി വർക്കല താലൂക്ക് ആശുപത്രിയിൽ ചികിത്സ തേടിയിരിക്കുകയാണ്.
Discussion about this post