തിരുവനന്തപുരം: ചികിത്സ പൂര്‍ത്തിയാക്കി വീട്ടിലെത്തിയ ഷീബയ്ക്ക് പെരുന്നാള്‍ സമ്മാനങ്ങളുമായി കെബി ഗണേഷ് കുമാര്‍ എംഎല്‍എ എത്തി. ആശുപത്രി അധികൃതരുടെ അനാസ്ഥയില്‍ മുറിവ് ഉണങ്ങാതെ ജീവിതം പ്രയാസത്തിലായിരുന്ന ഷീബയ്ക്ക് ആശ്വാസവുമായി എത്തിയത് ഗണേഷ് കുമാര്‍ ആയിരുന്നു.
ഏഴോളം ഓപ്പറേഷന് ശേഷവും മുറിവ് ഉണങ്ങാതെ ഒരുവര്‍ഷത്തോളം വേദന അനുഭവിച്ച ഷീബയുടെ അവസ്ഥ ഗണേഷ് കുമാര്‍ സഭയില്‍ ഉന്നയിച്ചിരുന്നു. ഇതോടെ ഒരുവിഭാഗം ഡോക്ടര്‍മാര്‍ ഗണേഷ് കുമാറിനെതിരെ വിമര്‍ശനങ്ങളുമായി രംഗത്തെത്തിയിരുന്നു.
എന്നാല്‍ ഗണേഷ് കുമാറിന്റെ ഇടപെടലിന് ശേഷം ഷീബയുടെ ചികിത്സ ആസ്റ്റര്‍ മെഡിസിറ്റി ഏറ്റെടുക്കുകയും പൂര്‍ണമായും സുഖപ്പെടുത്തുകയും ചെയ്തു. എട്ടരലക്ഷത്തോളം രൂപയുടെ ചികില്‍സ സൗജന്യമായിട്ടാണ് ചെയ്തത്. ഇതിനിടെ ഷീബയുടെ പണി തീരാത്ത വീടും ഉടന്‍ ശരിയാക്കി കൊടുക്കാമെന്ന് ഗണേഷ് കുമാര്‍ വാക്ക് നല്‍കിയിരുന്നു.