താനൂർ (മലപ്പുറം): ലോറി ബൈക്കിലും ഇലക്ട്രിക് പോസ്റ്റിലും ഇടിച്ച് തീപ്പിടിത്തമുണ്ടായ അപകടത്തിൽ ബൈക്ക് യാത്രികന് ദാരുണാന്ത്യം. കൊണ്ടോട്ടി വലിയപറമ്പ് സ്വദേശി നവാസാ(25)ണ് മരിച്ചത്. താനൂർ സ്‌കൂൾപടിയിൽ ശനിയാഴ്ച ഉച്ചയ്ക്ക് രണ്ടുമണിയോടെയായിരുന്നു ദാരുണസംഭവം.
താനൂർ ഭാഗത്തേക്ക് പോകുകയായിരുന്ന ബൈക്കിൽ എതിർദിശയിൽനിന്ന് നിയന്ത്രണംവിട്ടെത്തിയ ലോറി ഇടിക്കുകയായിരുന്നു. ഇടിയുടെ ആഘാതത്തിൽ ബൈക്ക് ലോറിക്കടിയിൽപ്പെട്ടു. പിന്നാലെ സമീപത്തെ വൈദ്യുതിപോസ്റ്റിലും ലോറിയിടിച്ചു. ഇതോടെ ലോറിക്കടിയിൽപ്പെട്ട ബൈക്കിന് തീപ്പിടിക്കുകയും ബൈക്ക് യാത്രികൻ വെന്തുമരിക്കുകയുമായിരുന്നു.
സംബവസ്ഥലത്ത് ഓടിക്കൂടിയ നാട്ടുകാരും താനൂർ അഗ്‌നിരക്ഷാസേന അംഗങ്ങളും ചേർന്നാണ് തീയണച്ചത്. ഒരുകിലോമീറ്ററിനുള്ളിലുള്ള അഗ്‌നിരക്ഷാനിലയത്തിൽ നിന്നും അതിവേഗത്തിൽ രക്ഷാപ്രവർത്തകർ എത്തിയതിനാൽ തന്നെ രക്ഷാപ്രവർത്തനം വേഗത്തിലായി.
എങ്കിലും യുവാവിന്റെ ജീവൻ രക്ഷിക്കാനായില്ല. ലോറിയുടെ ഡീസൽടാങ്കിലേക്ക് തീ പടരുന്നതിന് മുൻപേ തീയണക്കാനായത് വലിയ അപകടം ഒഴിവാക്കി.
ALSO READ- മകന്റെ മർദ്ദനത്തിൽ പരിക്കേറ്റ് ചികിത്സയിൽ; വിഷു ദിനത്തിൽ വയോധികന് ദാരുണമരണം
സംഭവസ്ഥലത്ത് വെച്ച്തന്നെ മരണമടഞ്ഞ നവാസിന്റെ മൃതദേഹം തിരൂർ ജില്ലാ ആശുപത്രിയിലേക്ക് മാറ്റി. അപകടത്തെ തുടർന്ന് തിരൂർ-കടലുണ്ടി റോഡിൽ ഏറെനേരം ഗതാഗതം തടസ്സപ്പെട്ടു.
Discussion about this post