കാസര്‍ഗോഡ്: ഓടിക്കൊണ്ടിരുന്ന കാറിന് തീപിടിച്ചു. കാസര്‍കോട് ജില്ലയിലെ കാഞ്ഞങ്ങാട് പുല്ലൊടിയിലാണ് സംഭവം. വിവാഹ നിശ്ചയത്തിന് പുറപ്പെട്ട നാലംഗ കുടുംബം സഞ്ചരിച്ച കാറിനാണ് തീപിടിച്ചത്.
അപകടത്തില്‍ ആളപായമില്ല. ഇന്ന് ഉച്ചക്ക് 12 മണിയോടെയാണ് അപകടം. വേണുഗോപാലും കുടുംബവും സഞ്ചരിച്ച കാറാണ് അപകടത്തില്‍പ്പെട്ടത്. കാറിലുണ്ടായിരുന്ന എല്ലാവരും രക്ഷപ്പെട്ടു.
പൊയ്‌നാച്ചിയില്‍ നിന്ന് മാലോം ഭാഗത്തേക്ക് വരുന്നതിനിടയിലായിരുന്നു അപകടം. തീ കണ്ട് കുടുംബം പെട്ടന്ന് പുറത്തിറങ്ങിയതിനാല്‍ വന്‍ ദുരന്തം ഒഴിവായി.
എന്നാല്‍ അപ്പോഴേക്കും നടുറോഡില്‍ വെച്ച് കാര്‍ ആളികത്തിയിരുന്നു. വിവരമറിയിച്ചതിനെ തുടര്‍ന്ന് ഫയര്‍ഫോഴ്‌സ് എത്തിയപ്പോഴേക്കും കാര്‍ പൂര്‍ണ്ണമായും കത്തിനശിച്ചിരുന്നു.