കാട്ടാക്കട: ആയുര്‍വേദ ചികിത്സാ കേന്ദ്രത്തിലെത്തിയ വിദേശ വനിതയെ പീഡിപ്പിച്ച കേസില്‍ വൈദ്യന്‍ അറസ്റ്റില്‍. തിരുവനന്തപുരം നെയ്യാര്‍ ഡാമില്‍ ബെല്‍ജിയം സ്വദേശിനിയെ ബലാത്സംഗം ചെയ്ത കേസില്‍ കോട്ടൂര്‍ സ്വദേശി 44 വയസുള്ള ഷാജിയെയാണ് നെയ്യാര്‍ ഡാം പോലീസ് അറസ്റ്റ് ചെയ്തത്.
യോഗ പഠിക്കാന്‍ മൂന്ന് മാസം മുന്‍പാണ് ബെല്‍ജിയം സ്വദേശിയായ യുവതി തിരുവനന്തപുരത്ത് എത്തിയത്. കഴിഞ്ഞമാസം 15നാണ് കേസിന് ആസ്പദമായ സംഭവം നടക്കുന്നത്. നെയ്യാര്‍ ഡാമിലെ ഹോം സ്റ്റേയില്‍ വച്ചാണ് ഷാജി യുവതിയെ പരിചയപ്പെടുന്നത്. യുവതിയുമായുള്ള പരിചയം മുതലാക്കി സ്വന്തം ആയുര്‍വേദ ചികിത്സാ കേന്ദ്രത്തിലേക്ക് ഇയാള്‍ യുവതിയെ ക്ഷണിച്ച് വരുത്തിയ ശേഷം ഇവിടെ വച്ച് ബലാത്സംഗം ചെയ്യുകയായിരുന്നുവെന്നാണ് കേസ്.
സംഭവത്തിന് പിന്നാലെ എറണാകുളത്തേക്ക് പോയ യുവതി തിരിച്ചെത്തിയ ശേഷം അസുഖബാധിതയായി കാട്ടാക്കടയിലെത്തി ചികിത്സ തേടുകയായിരുന്നു. ഇവിടുത്തെ ഡോക്ടറോട് ബെല്‍ജിയം സ്വദേശിനി നടത്തിയ വെളിപ്പെടുത്തലാണ് പ്രതിയുടെ അറസ്റ്റിലേക്ക് എത്തിച്ചത്.
യുവതി യോഗ പഠിക്കാനെത്തിയ യോഗാ പരിശീലന കേന്ദ്രം അധികൃതരാണ് വിവരം പോലീസിനെ അറിയിച്ചത്. യുവതിയുടെ മൊഴിയെടുത്ത പോലീസ് ഷാജിയെ പോലീസ് സ്റ്റേഷനിലേക്ക് വിളിച്ചുവരുത്തി അറസ്റ്റ് ചെയ്യുകയായിരുന്നു. കാട്ടാക്കട കോടതിയില്‍ ഹാജരാക്കിയ ഇയാളെ റിമാന്‍ഡ് ചെയ്തു.
Discussion about this post