പാലക്കാട് : കാണാതായ വിദ്യാര്‍ത്ഥി കെട്ടിടത്തില്‍ നിന്നും ചാടി മരിച്ച നിലയില്‍. പാലക്കാട് ജില്ലയിലെ പേഴുങ്കരയില്‍ നിന്നും കാണാതായ പതിനേഴുകാരനായ അനസ് ആണ് മരിച്ചത്.
ബിഗ് ബസാര്‍ സ്‌കൂളിലെ വിദ്യാര്‍ത്ഥിയാണ് അനസ്. അനസ് തൃശൂരില്‍ വച്ച് കെട്ടിടത്തിന് മുകളില്‍ നിന്ന് ചാടുകയായിരുന്നെന്ന് പൊലീസ് പറയുന്നു. ചൊവ്വാഴ്ചയാണ് അനസിനെ കാണാതാകുന്നത്.
അനസ് സ്ഥിരമായി പോയിരുന്ന കടയില്‍ നിന്ന് തലവേദനയാണെന്ന് പറഞ്ഞ്, നേരത്തെ ഇറങ്ങുകയായിരുന്നു. എന്നാല്‍ രാത്രി വൈകിയിട്ടും കുട്ടി വീട്ടില്‍ എത്തിയില്ല. അനസിനെ കാണാതായതോടെ ബന്ധുക്കള്‍ പൊലീസില്‍ പരാതി നല്കി.
ആദ്യം കുട്ടി ചാവക്കാടുണ്ടെന്ന വിവരം ലഭിച്ചിരുന്നു. തുടര്‍ന്ന് ബന്ധുക്കള്‍ അന്വേഷിച്ചെത്തിയെങ്കിലും അവിടെ നിന്ന് കുട്ടി കടന്നുകളഞ്ഞിരുന്നു. കയ്യിലുണ്ടായിരുന്ന മൊബൈലും വിറ്റതായി സൂചന ലഭിച്ചിരുന്നു.
സംഭവത്തില്‍ അന്വേഷണം പുരോഗമിക്കുന്നതിനിടയിലാണ് മരണം സംഭവിച്ചത്. വിദ്യാര്‍ത്ഥിയുടെ മരണം ബന്ധുക്കളെയും നാട്ടുകാരെയും സുഹൃത്തുക്കളെയും നടുക്കിയിരിക്കുകയാണ്.