മലപ്പുറം: നിലമ്പൂർ മമ്പാട് യുവതിയെ ഭർതൃവീട്ടിൽ മരിച്ച നിലയിൽ കണ്ടെത്തി. ചുങ്കത്തറ സ്വദേശിയായ സുൽഫത്തിനെയാണ് ജീവനൊടുക്കിയ നിലയിൽ കണ്ടെത്തിയത്. 24 വയസായിരുന്നു. സംഭവത്തിൽ ദുരൂഹതയുണ്ടെന്ന ബന്ധുക്കളുടെ പരാതിയിൽ ഭർത്താവ് ഷെമീറിനെ പോലീസ് കസ്റ്റഡിയിലെടുത്തു.
ബുധനാഴ്ച പുലർച്ചെ നാലുമണിയോടെയാണ് സുൽഫത്തിനെ ഭർതൃവീട്ടിൽ മരിച്ചനിലയിൽ കണ്ടത്. യുവതി തൂങ്ങി മരിച്ചതാണെന്നാണ് ഭർതൃവീട്ടുകാർ പറയുന്നത്. പുലർച്ചെ ഷെമീറിന്റെ വീട്ടിൽ നിന്ന് ബഹളം കേട്ടിരുന്നെങ്കിലും, പതിവായതിനാൽ അയൽക്കാർ ആദ്യം കാര്യമാക്കിയില്ല. പിന്നീട് ഷെമീറിന്റെ വീട്ടിലെത്തിയപ്പോളാണ് സുൽഫത്തിന്റെ മൃതദേഹം കെട്ടഴിച്ച ശേഷം നിലത്തു കിടത്തിയനിലയിൽ കണ്ടത്.
അതേസമയം, യുവതിയുടെ ശരീരത്തിൽ കയർ മുറുകിയതിന്റെ പാടുകളൊന്നും ഇല്ലെന്ന് യുവടിയുടെ ബന്ധുക്കൾ ആരോപിച്ചു. ഇതിനാലാണ് മരണത്തിൽ സംശയം പ്രകടിപ്പിച്ച് ബന്ധുക്കൾ പോലീസിന് പരാതി നൽകിയത്. ഷെമീർ-സുൽഫത്ത് ദമ്പതിമാർക്ക് രണ്ടുമക്കളാണുള്ളത്. നടപടികൾ പൂർത്തിയാക്കിയശേഷം മൃതദേഹം പോസ്റ്റ്മോർട്ടം മഞ്ചേരി മെഡിക്കൽ കോളേജ് ആശുപത്രിയിൽ നടത്തും.
Discussion about this post