മലപ്പുറം: ഹര്‍ത്താല്‍ അനുകൂലികള്‍ തിരൂര്‍ വെട്ടത്ത് ഗര്‍ഭിണിയെയും ഭര്‍ത്താവിനെയും മര്‍ദ്ദിച്ചതായി പരാതി. വെട്ടം ഇല്ലത്തപ്പടി തൈവളപ്പില്‍ രാജേഷ്, നിഷ എന്നിവര്‍ക്കാര്‍ണ് മര്‍ദ്ദനമേറ്റത്. പരിക്കേറ്റ ഇരുവരേയും തിരൂര്‍ ജില്ലാ ആശുപത്രിയില്‍ പ്രവേശിപ്പിച്ചു. ബൈക്കില്‍ വരികയായിരുന്ന ദമ്പതികളെ തടഞ്ഞ് നിര്‍ത്തി ബൈക്കില്‍ നിന്ന് പിടിച്ചിറക്കി മര്‍ദ്ദിച്ചെന്നാണ് പരാതി. അക്രമികള്‍ ബൈക്ക് മറിച്ചിടാന്‍ ശ്രമിച്ചെന്നും പരാതിയില്‍ പറയുന്നു.
ഭാര്യയേയും തന്നെയും സംഘം കൈയേറ്റം ചെയ്തെന്നും ഭീഷണിപ്പെടുത്തിയെന്നും രാജേഷ് പറഞ്ഞു. എന്‍ഡിഎ പിന്തുണയോടെ ശബരിമല കര്‍മസമിതി ആഹ്വാനം ചെയ്ത ഹര്‍ത്താലിനിടെ താനൂരിലും ആക്രമണമുണ്ടായിരുന്നു. സമരാനുകൂലികള്‍ നടത്തിയ കല്ലേറില്‍ രണ്ടു പോലീസ് ഉദ്യോഗസ്ഥര്‍ക്ക് പരിക്കേറ്റിരുന്നു. കോഴിക്കോട് വിവിധയിടങ്ങളില്‍ ബസുകള്‍ ആക്രമിച്ചും ഹര്‍ത്താല്‍ സംഘര്‍ഷഭരിതമാക്കിയിരിക്കുകയാണ് സംഘപരിവാര്‍.