മാന്നാര്‍: ആലപ്പുഴയില്‍ വിവാഹ വീട്ടില്‍ ആക്രമണം നടത്തിയ ഏഴംഗ സംഘത്തില്‍ മൂന്നുപേര്‍ പോലീസ് പിടിയില്‍. ചെന്നിത്തലയില്‍ വിവാഹ വീട്ടില്‍ അടുക്കള കാണല്‍ ചടങ്ങ് നടക്കുന്നതിനിടെയായിരുന്നു ആക്രമണം. സംഘത്തിലെ നാല് പേര്‍ക്കായി പോലീസ് അന്വേഷണം നടക്കുകയാണ്.
ചെന്നിത്തല ചെറുകോല്‍ സംഗീത് ഭവനത്തില്‍ സംഗീത് (20), ചെറുകോല്‍ ഇടശേരിയത്ത് വീട്ടില്‍ ജിഷ്ണു (22), ചെറുകോല്‍ ഗോകുല്‍ നിവാസില്‍ ഗോകുല്‍ കൃഷ്ണ (18) എന്നിവരെ പൊലീസ് അറസ്റ്റ് ചെയ്തത്. കഴിഞ്ഞ ദിവസം രാത്രിയിലായിരുന്നു നാടിനെ നടുക്കിയ സംഭവം.
അക്രമത്തില് രണ്ട് യുവാക്കള്‍ക്ക് പരിക്കേറ്റു. ചെറുകോല്‍ ചിത്തിരയില്‍ മിഥുന്‍ (26), ചെറുകോല്‍ വിഷ്ണു നിവാസില്‍ മനോജ് (26) എന്നിവര്‍ക്കാണ് തലയ്ക്ക് പരിക്കേറ്റത്. ചെന്നിത്തല ചെറുകോല്‍ അയ്യപ്പ ക്ഷേത്രത്തിന് സമീപമുള്ള വിവാഹ വീട്ടിലായിരുന്നു സംഭവം.
വരന്റെ വീട്ടില്‍ വധുവിന്റെ വീട്ടില്‍ നിന്ന് ബന്ധുക്കള്‍ എത്തി അടുക്കള കാണല്‍ ചടങ്ങ് നടക്കുന്നതിനിടെ ആണ് അക്രമം നടന്നത്. ബൈക്കിലെത്തിയ യുവാക്കള്‍ വീടിന് മുന്നിലൂടെ പല തവണ അസഭ്യം പറഞ്ഞ് കൊണ്ട് അമിത വേഗതയില്‍ ബൈക്കോടിച്ച് കൊണ്ട് ഭീതി പരത്തി.
വിവാഹ വീട്ടിലെ ആളുകള്‍ ചോദ്യം ചെയ്തതോടെ പ്രതികള്‍ തിരിച്ച് പോവുകയും കൂടുതല്‍ ആളുകളുമായി വന്ന് അക്രമം നടത്തുകയായിരുന്നു.