കൊല്ലം: വടക്കഞ്ചേരിയിൽ വിദ്യാർത്ഥികളടക്കം ഒമ്പത് പേരുടെ മരണത്തിനിടയാക്കിയ അപകടത്തിൽ ടൂറിസ്റ്റ് ബസ് ഓടിച്ച ഡ്രൈവർ ജോജോ എന്ന ജോമോൻ പത്രോസിന്റെ പഴയകാല വീഡിയോ വൈറലാകുന്നു. അപകടകരമാം വിധത്തിൽ ബസ് ഓടിക്കുന്ന ദൃശ്യങ്ങളാണ് പുറത്ത് വന്നിരിക്കുന്നത്. ഡ്രൈവിങ് സീറ്റിൽനിന്ന് എഴുന്നേറ്റ് നിന്ന് ചെരിഞ്ഞും നൃത്തം ചെയ്തുള്ളതുമാണ് ദൃശ്യങ്ങളിൽ കാണാൻ കഴിയുന്നത്.
അതേസമയം, അപകടത്തിന് പിന്നാലെ ഡ്രൈവറാണെന്ന കാര്യം മറച്ചുവെച്ച് സംഭവ സ്ഥലത്തുനിന്ന് മുങ്ങിയ ജോജോയെ തിരുവനന്തപുരത്തേക്ക് അഭിഭാഷകനെ കാണാനായി കടക്കുന്നതിനിടെയാണ് പോലീസ് അറസ്റ്റ് ചെയ്തത്. ജോമോന്റെ അറസ്റ്റ് രേഖപ്പെടുത്തിയിരുന്നു. മനഃപൂർവ്വമല്ലാത്ത നരഹത്യയ്ക്കാണ് പോലീസ് കേസെടുത്തത്. അതേസമയം, കൂടുതൽ വകുപ്പുകൾ ചുമത്തുമെന്നും റിപ്പോർട്ടുണ്ട്.
ഊട്ടിയിലേക്ക് വിനോദയാത്ര പോയ എറണാകുളം വെട്ടിക്കൽ ബസേലിയോസ് വിദ്യാനികേതൻ സ്‌കൂളിലെ വിദ്യാർഥികൾ സഞ്ചരിച്ച ടൂറിസ്റ്റ് ബസാണ് വടക്കഞ്ചേരിയിൽവെച്ച് അപകടത്തിൽപ്പെട്ടത്. കെ.എസ്.ആർ.ടി.സി. സൂപ്പർഫാസ്റ്റ് ബസിന്റെ പിന്നിൽ ഇടിച്ചുകയറിയ ശേഷം മറിയുകയായിരുന്നു. അപകടത്തിൽ വിദ്യാർത്ഥികളും അധ്യാപകനും അടക്കം ഒമ്പത് പേരാണ് മരണപ്പെട്ടത്.