വടക്കഞ്ചേരി: വടക്കഞ്ചേരി അപകടത്തിൽ ഡ്രൈവർ ജോമോന്റെ അറസ്റ്റ് രേഖപ്പെടുത്തി. ഒമ്പത് പേരുടെ ജീവൻ നഷ്ടമായ സംഭവത്തിലാണ് ടൂറിസ്റ്റ് ബസ്സിന്റെ ഡ്രൈവർ പെരുമ്പടവം പൂക്കോട്ടിൽവീട്ടിൽ ജോമോൻ പത്രോസിനെതിരെ മനഃപൂർവമല്ലാത്ത നരഹത്യയ്ക്കാണ് ആദ്യം കേസെടുത്തത്. സംഭവത്തിൽ കൂടുതൽ വകുപ്പുകൾ ചുമത്തുമെന്ന് പോലീസ് അറിയിച്ചു.
വെള്ളിയാഴ്ച പുലർച്ചെ മൂന്നരയോടെ കൊല്ലം ചവറയിൽ വച്ചാണ് ചോദ്യം ചെയ്യലിന് ശേഷമാണ് അറസ്റ്റ് രേഖപ്പെടുത്തിയത്. നിലവിൽ ആലത്തൂർ ഡിവൈ.എസ്.പി.യുടെ നേതൃത്വത്തിൽ ജോമോനെ ചോദ്യം ചെയ്യൽ തുടരുകയാണ്. അശ്രദ്ധയും അമിതവേഗതയുമാണ് അപകടകാരണമെന്ന് മോട്ടോർവാഹനവകുപ്പ് അറിയിച്ചു.
നിസ്സാരപരിക്കേറ്റ് ചികിത്സതേടി ആശുപത്രിയിൽ നിന്ന് മുങ്ങിയ ജോമോനെ ഫോൺ ലൊക്കേഷൻ പിന്തുടർന്നാണ് ചവറ പോലീസ് കാർ തടഞ്ഞ് പിടികൂടിയത്. സുഹൃത്തുക്കൾക്കൊപ്പം കാറിൽ അഭിഭാഷകനെ കാണാൻ തിരുവനന്തപുരം ഭാഗത്തേക്ക് പോകവെയാണ് പോലീസ് ജോമോനെ പിടികൂടിയത്. കൂടുതൽ തെളിവുകൾക്കായി ജോമോനെ അപകടസ്ഥലത്തെത്തിച്ച് വിവരങ്ങൾ ശേഖരിക്കും. ഒപ്പമുണ്ടായിരുന്ന കോട്ടയം, എറണാകുളം സ്വദേശികളായ രണ്ടുപേരെക്കൂടി കസ്റ്റഡിയിലെടുത്തിട്ടുണ്ട്.
Discussion about this post