കൊല്ലം: ഇഷ്ടപ്പെട്ട പെൺകുട്ടി അടുപ്പം കാണിക്കാത്തതിന്റെ പേരിൽ വീടുകയറി അയൽവാസികൾ ആയ സ്ത്രീകളെ ആക്രമിച്ച സംഭവത്തിൽ പ്രതി പിടിയിൽ. പുനലൂർ അഷ്ടമംഗലം മനുഭവനിൽ 28കാരൻ അനു മോഹനാണ് അറസ്റ്റിലായത്. കഴിഞ്ഞദിവസം നാലോടെ അഷ്ടമംഗലത്താണ് ദാരുണ സംഭവം നടന്നത്.
അഷ്ടമംഗലം സ്വദേശികളും അയൽവാസികളുമായ ഗിരിജ, ശരണ്യ, സുശീല, സുധർമ എന്നിവരാണ് അക്രമണത്തിന് ഇരയായത്. അയൽവാസിയായ അനിൽകുമാറിനും ആക്രമണത്തിൽ പരിക്ക് സംഭവിച്ചിട്ടുണ്ട്. അനിൽകുമാറിന്റെ കൈത്തണ്ടയിൽ കടിച്ച് പറിച്ചുവെന്നാണ് പരാതി.
ഇഷ്ടമുള്ള പെൺകുട്ടി അടുപ്പംകാണിക്കാത്തതിന് അയൽവാസികളായ സ്ത്രീകളാണ് കാരണക്കാരെന്ന തെറ്റിദ്ധാരണയിലാണ് അനു അക്രമം നടത്തിയതെന്ന് പോലീസ് പറഞ്ഞു. വീട്ടിൽ അതിക്രമിച്ചുകടന്ന പ്രതി ഗിരിജയെ മുടിക്കുകുത്തിപ്പിടിച്ച് വലിച്ചിഴയ്ക്കുകയും കല്ലുകൊണ്ടിടിച്ചു പരിക്കേൽപ്പിക്കുകയും ചെയ്തു.
തുടർന്ന് പുറത്തിറങ്ങി അയൽവാസികളായ ശരണ്യയെയും ഇവരുടെ അമ്മായിയമ്മ സുശീലയെയും അയൽവാസിയായ സുധാമണിയെയും ഹെൽമെറ്റുകൊണ്ട് തലങ്ങും വിലങ്ങും മർദിക്കുകയായിരുന്നു. ഇവരുടെ നിലവിളികേട്ട് ഓടിയെത്തുമ്പോഴാണ് അനിൽകുമാറിനും മർദനമേറ്റത്. മർദനമേറ്റവർ പുനലൂർ താലൂക്ക് ആശുപത്രിയിൽ ചികിത്സതേടി. തുടർന്ന് നൽകിയ പരാതിയുടെ അടിസ്ഥാനത്തിൽ ആണ് അനുവിനെ പോലീസ് പിടികൂടിയത്.
Discussion about this post