മലപ്പുറം: മലപ്പുറത്ത് വാഹനാപകടത്തില്‍ രണ്ട് വിദ്യാര്‍ത്ഥികള്‍ക്ക് ദാരുണാന്ത്യം. മഞ്ചേരി പന്തല്ലൂരിലാണ് അപകടം സംഭവിച്ചത്. വെള്ളുവങ്ങാട് സ്വദേശിയും ഇരുപത് വയസ്സുകാരനുമായ അമീനും കിഴാറ്റൂര്‍ സ്വദേശിയും പതിനേഴുകാരനുമായ ഇഹ്‌സാനുമാണ് മരിച്ചത്.
പന്തല്ലൂര്‍ മൂടിക്കോടിലായിരുന്നു നാടിനെ നടുക്കിയ അപകടം സംഭവിച്ചത്. ബസും ബൈക്കും കൂട്ടിയിടിച്ചാണ് അപകടം ഉണ്ടായത്. ബൈക്ക് യാത്രികരായ വിദ്യാര്‍ത്ഥികളാണ് മരിച്ചത്. പാണ്ടിക്കാട് അന്‍സാര്‍ കോളേജിലെ വിദ്യാര്‍ത്ഥികളാണ് ഇരുവരും.
also read: മറ്റൊരാളുമായി ചാറ്റ് ചെയ്‌തെന്നാരോപിച്ച് യുവതിയ്ക്ക് ക്രൂര മർദ്ദനം; 24കാരൻ അറസ്റ്റിൽ
മഞ്ചേരിയില്‍ നിന്ന് പാണ്ടിക്കാട് ഭാഗത്തേക്ക് പോവുകയായിരുന്ന സ്വകാര്യ ബസും പന്തല്ലൂര്‍ ഭാഗത്തേക്ക് പോവുകയായിരുന്ന ബൈക്കും തമ്മില്‍ കൂട്ടിയിടിക്കുകയായിരുന്നു. ഇടിയുടെ ആഘാതത്തില്‍ ബൈക്കിന്റെ മുന്‍വശം പൂര്‍ണമായും തകര്‍ന്നു.
അപകടവിവരമറിഞ്ഞെത്തിയ നാട്ടുകാര്‍ ഗുരുതരമായി പരിക്കേറ്റ വിദ്യാര്‍ത്ഥികളെ ആശുപത്രിയില്‍ എത്തിച്ചെങ്കിലും അപ്പോഴേക്കും മരണം സംഭവിച്ചിരുന്നു. മൃതദേഹങ്ങള്‍ മഞ്ചേരി മെഡിക്കല്‍ കോളേജില്‍ എത്തിച്ചു.