കൊച്ചി: ബിഗ് ബോസ് മലയാളം നാലാം സീസണിലൂടെ താരമായ ഡോ. റോബിന്‍ രാധാകൃഷ്ണന്‍ സഞ്ചരിച്ച കാര്‍ അപകടത്തില്‍പ്പെട്ടു. തൊടുപുഴയില്‍ ഒരു ഉദ്ഘാടനത്തിന് പോകവേയാണ് അപകടമുണ്ടായത്.
അപകടത്തില്‍ നിന്നും തലനാരിഴയ്ക്കാണ് താരം രക്ഷപ്പെട്ടത്. അപകടശേഷം റോബിന്‍ ഉദ്ഘാടനത്തില്‍ പങ്കെടുക്കുന്നതിന്റെ വീഡിയോ സമൂഹ മാധ്യമങ്ങളില്‍ പ്രചരിക്കുന്നുണ്ട്.
‘വരുന്ന വഴിക്ക് എന്റെ കാര്‍ അപകടത്തില്‍പ്പെട്ടു. കാര്‍ കൊക്കയിലേക്ക് മറിഞ്ഞു. ജസ്റ്റ് മിസ്സിന് ഒരു കല്ലില്‍ തട്ടി നിന്നത് കൊണ്ടാണ് രക്ഷപ്പെട്ടത്’, റോബിന്‍ അപകടത്തെക്കുറിച്ച് പറഞ്ഞു.
ബിഗ് ബോസ് നാലാം സീസണില്‍ ഏറ്റവും അധികം ആരാധകരെ സ്വന്തമാക്കിയ മത്സരാര്‍ത്ഥിയായിരുന്നു ഡോ. റോബിന്‍ രാധാകൃഷ്ണന്‍. സഹ മത്സരാര്‍ത്ഥിയായിരുന്ന റിയാസിനെ ശാരീരിക ഉപദ്രവം ചെയ്തതിനെ തുടര്‍ന്ന് റോബിന്‍ ബിഗ് ബോസില്‍ നിന്നും പുറത്താക്കുകയായിരുന്നു.
ബിഗ് ബോസില്‍ നിന്നും പുറത്തായ റോബിന്‍ വിമാനത്താവളത്തില്‍ വന്നിറങ്ങുന്നതിന്റെ ചിത്രങ്ങളും വീഡിയോകളും സാമൂഹിക മാധ്യമങ്ങളില്‍ വൈറലായിരുന്നു.
അതേസമയം സിനിമ അരങ്ങേറ്റത്തിന് ഒരുങ്ങുകയാണ് റോബിന്‍ ഇപ്പോള്‍. സന്തോഷ് ടി കുരുവിള നിര്‍മ്മിക്കുന്ന ചിത്രത്തിലൂടെയാണ് റോബിന്‍ അഭിനയ രംഗത്തേക്ക് ചുവടുവെക്കുന്നത്. സിനിമയുടെ പേരോ മറ്റു വിവരങ്ങളോ അണിയറ പ്രവര്‍ത്തകര്‍ പുറത്തുവിട്ടിട്ടില്ല.