കച്ചവടം ചെയ്യുന്ന മുസ്ലീങ്ങള്‍ പാനീയങ്ങളില്‍ വന്ധ്യത വരുത്താനുള്ള മരുന്നുകള്‍ ബോധപൂര്‍വം കലര്‍ത്തുന്നുവെന്ന ജനപക്ഷത്തിന്റെ നേതാവും മുന്‍ എംഎല്‍എയുമായ പിസി ജോര്‍ജ്ജിന്റെ വിദ്വേഷ പരാമര്‍ശത്തില്‍ രൂക്ഷവിമര്‍ശനങ്ങള്‍ ഉയരുകയാണ്. നിരവധി പേരാണ് ഇതിനോടകം പിസി ജോര്‍ജിനെ വിമര്‍ശിച്ച് രംഗത്തെത്തിയത്.
എന്ത് മാത്രം വര്‍ഗീയവിഷമാണിയാള്‍ വമിച്ച് കൊണ്ടിരിക്കുന്നതെന്ന് ഡോക്ടര്‍ ഷിംന അസീസ് പറയുന്നു. ഫേസ്ബുക്കിലൂടെയായിരുന്നു ഷിംനയുടെ പ്രതികരണം.
also read: ബറോസിൽ നിന്ന് പിന്മാറിയതിൽ വിഷമമുണ്ടെന്ന് പൃഥ്വിരാജ് സുകുമാരൻ
ഇമ്മാതിരി പാഷാണത്തില്‍ കൃമികളെയൊക്കെ സമയം കളയാതെ പിടിച്ച് കെട്ടിയിട്ടില്ലയെങ്കില്‍ സമൂഹത്തില്‍ വെറുപ്പും വിദ്വേഷവും കൂടിക്കൂടി മനുഷ്യര്‍ തമ്മില്‍ത്തല്ലി ചാവുന്നത് കാണാന്‍ അധികകാലമൊന്നും വേണ്ടി വരില്ലെന്ന് ഷിംന കൂട്ടിച്ചേര്‍ത്തു.
ഫേസ്ബുക്ക് കുറിപ്പിന്റെ പൂര്‍ണ്ണരൂപം
മുസ്ലിങ്ങളുടെ ഹോട്ടലില്‍ ഒരു ഫില്ലര്‍ വെച്ചിട്ടുണ്ടെന്നും അതിലൊരു തുള്ളി അവര്‍ ചായയില്‍ ഒഴിച്ചാല്‍ സ്ത്രീകളും പുരുഷന്‍മാരും വന്ധ്യംകരിക്കപ്പെടുമെന്നും പിസി ജോര്‍ജ്. എന്ത് മാത്രം വര്‍ഗീയവിഷമാണിയാള്‍ വമിച്ച് കൊണ്ടിരിക്കുന്നത്!
പോരാത്തതിന് ലുലുമാള്‍ മലപ്പുറത്ത് വരാത്തത് യൂസഫലിക്ക് ഹിന്ദുക്കളുടെയും ക്രിസ്ത്യാനികളുടെയും മാത്രം കാശ് പിടുങ്ങാനാണത്രേ.
ഗള്‍ഫിലൊക്കെ മുക്കിന് മുക്കിന് ലുലു ഉള്ളതൊക്കെ ഏത് വകുപ്പിലാണാവോ… സദസ്സ് ഇതൊക്കെ കേള്‍ക്കുകയും കൈയ്യടിക്കുകയും ചെയ്യുന്നുണ്ട്. ഇമ്മാതിരി പാഷാണത്തില്‍ കൃമികളെയൊക്കെ സമയം കളയാതെ പിടിച്ച് കെട്ടിയിട്ടില്ലയെങ്കില്‍ സമൂഹത്തില്‍ വെറുപ്പും വിദ്വേഷവും കൂടിക്കൂടി മനുഷ്യര്‍ തമ്മില്‍ത്തല്ലി ചാവുന്നത് കാണാന്‍ അധികകാലമൊന്നും വേണ്ടി വരില്ല…!
