കൊല്ലം: ആനയുടെ ആക്രമണത്തെ തുടർന്ന് പാപ്പാന് ഗുരുതര പരിക്കേറ്റ സംഭവത്തിൽ രണ്ടാം പാപ്പാന് എതിരെ ആരോപണം. കൊല്ലം കേരളപുരത്താണ് ആനയുടെ ചവിട്ടേറ്റ് പാപ്പാന് പരിക്കേറ്റത്. ഒന്നാം പാപ്പാൻ സച്ചുവിനെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ഇയാളുടെ നിരവധി എല്ലുകൾ പൊട്ടിയിട്ടുണ്ടെന്നും പരിക്ക് ഗുരുതരമാണെന്നുമാണ് റിപ്പോർട്ട്.
ഞായറാഴ്ച വൈകുന്നേരം ആറ് മണിയോടെയാണ് സംഭവം. സമീപത്തെ അമ്പലത്തിലെ ഉത്സവ ചടങ്ങുകൾക്കായി കൊണ്ടുവന്ന ആനയാണ് പാപ്പാൻമാരെ ആക്രമിച്ചത്.
ഒന്നാം പാപ്പന്റെ സാന്നിധ്യത്തിൽ ആനയെ രണ്ടാം പാപ്പാൻ മർദ്ദിച്ചതാണ് ആക്രമണത്തിന് കാരണമായതെന്ന് വീഡിയോ ദൃശ്യങ്ങളിൽ നിന്നും വ്യക്തമായി. ആനയുടെ മുൻകാലിൽ പാപ്പാൻ മർദ്ദിക്കുന്നത് ദൃശ്യങ്ങളിൽ വ്യക്തമാണ്. ആനയുടെ പുറത്തിരുന്ന പാപ്പാന്റെ കൈയിലുണ്ടായിരുന്ന സഞ്ചി താഴെ വീണു. അത് എടുക്കാനായി പാപ്പാൻ താഴേക്ക് ഇറങ്ങുകയായിരുന്നു. ഈ സമയം ആനയുടെ മുൻകാലിൽ രണ്ടാം പാപ്പാൻ വടി കൊണ്ട് മർദ്ദിച്ചു. ഇതിൽ പ്രകോപിതനായ ആന ഇരു പാപ്പാൻമാരെയും ആക്രമിക്കുകയായിരുന്നു.
അതേസമയം, തുടക്കത്തിൽ ആന അബദ്ധത്തിൽ പാപ്പാനെ ചവിട്ടി എന്നായിരുന്നു ആദ്യം ഇവർ പറഞ്ഞിരുന്നത്. എന്നാൽ ദൃശ്യങ്ങൾ പുറത്തുവന്നതോടെയാണ് പ്രകോപനം ഉണ്ടായതിനെത്തുടർന്നാണ് ആന ആക്രമിച്ചതെന്ന് വ്യക്തമായത്.
Discussion about this post