കോട്ടയം: കോട്ടയത്ത് കാരാപ്പുഴയിൽ പാലത്തിന് സമീപത്ത് കാർ നിർത്തിയിട്ട് കാറിനകത്തിരുന്ന് സംസാരിച്ചിരുന്ന യുവതിയെയും യുവാവിനെയും ചോദ്യം ചെയ്ത പ്രദേശവാസിക്ക് മർദ്ദനം. കഴിഞ്ഞദിവസം വൈകിട്ട് മൂന്നരയോടെയായിരുന്നു സംഭവം. കോട്ടയം കാരാപ്പുഴ പാലത്തിന് സമീപം റോഡിൽ കാർ നിർത്തിയിട്ട് സംസാരിക്കുകയായിരുന്നു യുവതിയും യുവാവും. ഈ സമയം ഇതുവഴി പോയ പ്രദേശവാസിയായ യുവാവ് കാറിന്റെ ചില്ലിൽ തട്ടിയ ശേഷം ഇരുവരെയും ചോദ്യം ചെയ്യുകയായിരുന്നു.
ഇതോടെ കാറിനുള്ളിൽ ഉണ്ടായിരുന്ന യുവാവും പ്രദേശവാസിയും തമ്മിൽ വാക്കുതർക്കമായി. തുടർന്ന് കാറിനുള്ളിൽ നിന്നും ഇറങ്ങിയെത്തിയ യുവാവ് പ്രദേശവാസിയായ യുവാവിനെ മർദിക്കുകയായിരുന്നു. ക്രൂരമായ മർദനമേറ്റ് ശരീരത്തിൽ മുറിവുകളുമായി യുവാവ് റോഡിൽ കിടന്നു. നാട്ടുകാർ ഓടിക്കൂടിയതോടെ യുവാവും യുവതിയും കാറുമായി സ്ഥലത്തുനിന്നും കടന്നുകളഞ്ഞു.
സ്ഥലത്ത് തടിച്ചുകൂടിയ നാട്ടുകാർ സംഭവം പോലീസ് കൺട്രോൾ റൂമിലും വെസ്റ്റ് പോലീസ് സ്റ്റേഷനിലും അറിയിച്ചു. വിവരം അറിഞ്ഞ് സ്ഥലത്തെത്തിയ പോലീസ് സംഘമാണ് പരിക്കേറ്റ യുവാവിനെ ആശുപത്രിയിലെത്തിച്ചത്. കാർ നമ്പർ സഹിതം നാട്ടുകാർ പോലീസിൽ പരാതിപ്പെട്ടു.