പാലക്കാട്: മലമ്പുഴ ചേറാട് മലയിൽ അകപ്പെട്ട ബാബുവിനെ 42 മണിക്കൂറുകൾക്ക് ശേഷം രക്ഷപ്പെടുത്തിയ രക്ഷാപ്രവർത്തകർക്ക് നന്ദി അറിയിച്ച് മുഖ്യമന്ത്രി. ആരോഗ്യം വീണ്ടെടുക്കാൻ ആവശ്യമായ ചികിത്സ ഉൾപടെ സർക്കാർ ഉറപ്പാക്കുമെന്ന് മുഖ്യമന്ത്രി പിണറായി വിജയൻ ഫേസ്ബുക്കിലൂടെ അറിയിച്ചു.
രക്ഷാപ്രവർത്തനത്തിൽ പങ്കെടുത്ത ഓരോ സംഘങ്ങൾക്കും മുഖ്യമന്ത്രി പ്രത്യേകം നന്ദി അറിയിച്ചിട്ടുണ്ട്.
അതേസമയം ബാബുവിനെ രക്ഷിക്കുന്നതിൻ്റെയും രക്ഷിച്ചതിന് ശേഷം രക്ഷാപ്രവർത്തകർക്കൊപ്പം നിൽക്കുന്നതിൻ്റെയും ചിത്രങ്ങൾ സോഷ്യൽ മീഡിയയിൽ വൈറൽ ആവുകയാണ്.
മുഖ്യമന്ത്രിയുടെ നന്ദി പറഞ്ഞുള്ള കുറിപ്പ്:
ആശങ്കകൾക്കു വിരാമമിട്ട് മലമ്പുഴയിലെ ചെറാട് മലയിൽ കുടുങ്ങിയ ബാബുവിനെ സുരക്ഷിത സ്ഥാനത്ത് എത്തിക്കാൻ സാധിച്ചു. ആരോഗ്യം വീണ്ടെടുക്കാൻ ആവശ്യമായ ചികിത്സയും പരിചരണവും എത്രയും പെട്ടെന്ന് നൽകും. രക്ഷാപ്രവർത്തനങ്ങൾക്ക് നേതൃത്വം നൽകിയ ഇന്ത്യൻ സേനയുടെ മദ്രാസ് റെജിമെൻ്റിലെ സൈനികർ, പാരാ റെജിമെന്‍റ് സെന്‍ററിലെ സൈനികർ, രക്ഷാപ്രവർത്തനം ഏകോപിപ്പിച്ച ദക്ഷിണ ഭാരത ഏരിയ ജി ഒ സി ലഫ്റ്റനന്‍റ് ജനറൽ അരുൺ തുടങ്ങി അവസരോചിതമായ ഇടപെടലുകളിലൂടെ സഹായം നൽകിയ എല്ലാവർക്കും നന്ദി പറയുന്നു. രക്ഷാപ്രവർത്തനവുമായി സഹകരിച്ച വ്യോമസേനക്കും കോസ്റ്റ് ഗാർഡിനും കേരള പോലീസ്, ഫയർ & റസ്ക്യൂ, എന്‍ ഡി ആര്‍ എഫ്, വനം വകുപ്പ്, ജില്ലാ ഭരണസംവിധാനം, മെഡിക്കല്‍ സംഘം, ജനപ്രതിനിധികൾ,
നാട്ടുകാർ എന്നിവർക്കും നന്ദി രേഖപ്പെടുത്തുന്നു.
Discussion about this post