മലപ്പുറം: ടെക്‌സ്‌റ്റൈല്‍സിലെ നറുക്കെടുപ്പില്‍ സമ്മാനമായി ലഭിച്ച കാര്‍ അയല്‍വാസിയുമായി പങ്കിട്ട് യുവതി. മലപ്പുറം ചെട്ടിപ്പടി കുപ്പിവളവ് സ്വദേശി കാടശേരി അഞ്ജുവിനാണ് കാര്‍ സമ്മാനമായി ലഭിച്ചത്. ചെമ്മാടുള്ള മാനസ ടെക്‌സ്‌റ്റൈല്‍സില്‍ നിന്നാണ് അഞ്ജുവിന് മാരുതി ബലേനോ കാര്‍ ലഭിച്ചത്.
അഞ്ജുവിന്റെ അയല്‍വാസിയായ സിനീഷിന്റെ വിവാഹ നിശ്ചയത്തിനുള്ള വസ്ത്രം വാങ്ങാന്‍ പോയപ്പോഴായിരുന്നു നറുക്കെടുപ്പ് കൂപ്പണില്‍ അഞ്ജു പേര് എഴുതിയിട്ടത്. ഏതായാലും സമ്മാനമായി ലഭിച്ച കാര്‍ അഞ്ജു, സിനീഷുമായി പങ്കിട്ടിരിക്കുകയാണ്.
ഇക്കഴിഞ്ഞ ജൂണ്‍ 22നാണ് സിനീഷിന്റെ വിവാഹ നിശ്ചയത്തിന് വസ്ത്രം വാങ്ങാന്‍ അയല്‍ക്കാരിയായ അഞ്ജു ഒപ്പം പോയത്. വസ്ത്രം എടുത്തതിന് ശേഷം നറുക്കെടുപ്പിന്റെ ഭാഗമായ ലഭിച്ച കൂപ്പണുകളില്‍ എല്ലാവരുടെയും പേര് എഴുതി ഇടുകയായിരുന്നു. കഴിഞ്ഞ ദിവസമാണ് നറുക്കെടുപ്പ് നടന്നത്.
നറുക്കെടുപ്പിലാണ് അഞ്ജുവിന് കാര്‍ സമ്മാനമായി ലഭിച്ചത്. വസ്ത്രം വാങ്ങിയ സിനീഷിനുമായി കാര്‍ പങ്കിടാമെന്ന കാര്യം അഞ്ജു തന്നെയാണ് മുന്നോട്ടുവെച്ചത്. ആദ്യം സിനീഷ് ഇത് നിരസിച്ചെങ്കിലും അഞ്ജുവിന്റെ നിര്‍ബന്ധത്തിന് വഴങ്ങി സമ്മതിക്കുകയായിരുന്നു.
കഴിഞ്ഞ ദിവസമാണ് നറുക്കെടുപ്പില്‍ വിജയിച്ചവരുടെ സമ്മാനങ്ങള്‍ വിതരണം ചെയ്തത്. സമ്മാനമായി ലഭിച്ച മാരുതി ബെലേനോ കാര്‍ വാങ്ങാനായി അഞ്ജുവിന്റെ സഹോദരന്‍ അഖിലും സിനീഷുമാണ് എത്തിയത്. പരപ്പനങ്ങാടി നഗരസഭാ കൗണ്‍സിലര്‍ സി ജയദേവന്‍, മാനസ ടെക്‌സ്‌റ്റൈല്‍സ് എംഡി സാഹിര്‍ കുന്നുമ്മല്‍, സിഇഒ യൂനുസ് പള്ളിയാളി എന്നിവര്‍ പങ്കെടുത്ത ചടങ്ങിലാണ് സമ്മാനം വിതരണം ചെയ്തത്.