നടിയെ ആക്രമിച്ച കേസിൽ നടൻ ദിലീപ് വിചാരണ നേരിടുന്നതിനിടെ സ്ത്രീകളുടെ സുഹൃത്തും വഴികാട്ടിയും എന്ന ടാഗ് ലൈനുള്ള വനിത മാഗസിൻ പ്രതിയുടെ കുടുംബ വിശേഷം പങ്കുവെച്ച് വിവാദത്തിൽ. മനോരമ കുടുംബത്തിൽ നിന്നുള്ള സ്ത്രീ മാഗസിന് എതിരെ രൂക്ഷമായ വിമർശനമാണ് ഉയരുന്നത്. പ്രതി ദിലീപിന് എതിരെ തുടർച്ചയായി വെളിപ്പെടുത്തലുകൾ പുറത്തുവരികയും താരം കുറ്റക്കാരാനായി തന്നെ തുടരുകയും ചെയ്യുന്നതിനിടെയാണ് മാഗസിന്റെ നടപടി.
ബോളിവുഡിൽ നിന്നും മാഗസിന്റെ പ്രവർത്തിക്ക് എതിരെ രോഷമുയരുന്നതും ഇതിനിടെ ശ്രദ്ധേയമാവുകയാണ്. ബോളിവുഡ് നടി സ്വര ഭാസ്‌കറാണ് മാസികയെ വിമർശിച്ച് പരസ്യമായി രംഗത്ത് എത്തിയത്. വനിത മാസികയെ ഓർത്ത് ലജ്ജിക്കുന്നുവെന്നാണ് ബോളിവുഡ് നടി സ്വര ഭാസ്‌കർ ട്വിറ്ററിൽ കുറിച്ചത്.
This man is Dileep- Malyalam film industry star (pretty incriminatingly) accused of sponsoring the kidnapping & assault of an actress & colleague in 2017. Spent many months in jail. On bail now. Victim has written to Kerala CM to expedite justice. Shame on you Vanitha magazine. https://t.co/nwfte7ouup
— Swara Bhasker (@ReallySwara) January 6, 2022
‘2017-ൽ നടിയും സഹപ്രവർത്തകയുമായ താരത്തെ തട്ടിക്കൊണ്ടുപോയി ആക്രമിച്ച കേസിൽ കുറ്റാരോപണം നേരിടുന്ന വ്യക്തിയാണ് നടൻ ദിലീപ്. നിരവധി മാസങ്ങളാണ് അദ്ദേഹം ഈ കേസിൽ ജയിലിൽ കഴിഞ്ഞത്. ഇപ്പോൾ ജാമ്യത്തിലാണ്. കേസിൽ നീതി വേഗത്തിൽ ലഭിക്കാൻ ഇര മുഖ്യമന്ത്രിക്ക് കത്തയച്ചിരുന്നു. വനിത മാഗസിനെ ഓർത്ത് ലജ്ജിക്കുന്നു.’ എന്നും അവർ ട്വീറ്റിൽ പറയുന്നു.
നടിയെ ആക്രമിച്ച കേസിലെ എട്ടാം പ്രതിയും നടനുമായ ദിലീപിനെ കവർ ചിത്രമായി ഉപയോഗിക്കുന്ന വനിത മാസിക എന്ത് സന്ദേശമാണ് നൽകുന്നതെന്നാണ് സോഷ്യൽമീഡിയ ചോദിക്കുന്നത്. കഴിഞ്ഞകുറച്ചുനാളുകളായി മനോരമ ഓൺലൈനിലും വനിത അടക്കമുള്ള പ്രസിദ്ധീകരണങ്ങളിലും നിറഞ്ഞുനിൽക്കുന്ന ദിലീപിന്റേയും കുടുംബത്തിന്റേയും വിശേഷങ്ങളും ദിലീപിന്റെ സിനിമാ വിശേഷങ്ങളും കുറ്റക്കാരനായ താരത്തെ വെളുപ്പിച്ചെടുക്കാനുള്ള ശ്രമമാണെന്നും വ്യാപക വിമർശനം ഉയരുന്നുണ്ട്.