കോട്ടയം: കനത്ത മഴയില്‍ വെള്ളം നിറഞ്ഞോടെ പാമ്പുകള്‍ കൂട് വിട്ട് ഇറങ്ങുന്നു. മീന്‍ പിടിക്കാന്‍ വച്ചിടത്തെല്ലാം കുടുങ്ങുന്നത് മൂര്‍ഖനും അണലിയും പെരുമ്പാമ്പുമൊക്കെയാണ്.
കോട്ടയത്ത് കുമരകം,തിരുവാര്‍പ്പ്, അയ്മനം മേഖലകളില്‍ മീന്‍ കൂടകളിലും വലകളിലും പാമ്പുകള്‍ കുടുങ്ങുന്നു. കുമരകം കൊച്ചിടവട്ടം ഭാഗത്ത് ഇന്നലെ വലയില്‍ കുടുങ്ങിയ നിലയില്‍ പെരുമ്പാമ്പിനെ കണ്ടെത്തി. വനംവകുപ്പ് അധികൃതര്‍ എത്തി പെരുമ്പാമ്പിനെ കൊണ്ടു പോയി.
ബോട്ട് ജെട്ടി ഭാഗത്ത് വലയില്‍ കുടുങ്ങി അണലിയെയും ഒന്നാം കലുങ്ക് ഭാഗത്ത് മീന്‍ കൂട്ടില്‍ കുടുങ്ങി മൂര്‍ഖനെയും കിട്ടി. അയ്മനം വല്യാട് സഹകരണ ബാങ്കിനു സമീപം തോട്ടില്‍ മീന്‍ പിടിക്കാന്‍ ഇട്ട കൂട്ടില്‍ പെരുമ്പാമ്പ് കയറി.
വെള്ളപ്പൊക്കമായതോടെ ആണ് ഇവയെ കൂടുതലായി കണ്ട് തുടങ്ങിയത്. മാളങ്ങളില്‍ വെള്ളം കയറിയതോടെ ഇവ മറ്റു പ്രദേശങ്ങള്‍ തേടി പായുന്നു.