കൊല്ലം: മലവെള്ളത്തില്‍ ഒഴുകിവരുന്ന ആക്രി സാധനങ്ങള്‍ പെറുക്കാന്‍ ഇറങ്ങിയ തമിഴ്‌നാട് സ്വദേശി മുങ്ങിപ്പോയി. വെള്ളത്തില്‍ വീണ് രണ്ടു മണിക്കൂറിലധികം മരക്കൊമ്പില്‍ പിടിച്ചുകിടന്ന മുത്തുവിനെ പോലീസ് അതിസാഹസികമായി രക്ഷിക്കുന്ന വീഡിയോ ഇപ്പോള്‍ സോഷ്യല്‍മീഡിയയില്‍ വൈറലാവുകയാണ്.
കൊല്ലം റൂറലിലെ അഞ്ചല്‍ സ്റ്റേഷന്‍ പരിധിയില്‍ തഴമേല്‍ ഇത്തിക്കരയാറിനു സമീപം കുടുങ്ങിയ ഒരാളെ രക്ഷിക്കുന്നതാണ് ദൃശ്യങ്ങളില്‍. മലവെള്ളത്തില്‍ ഒഴുകിവരുന്ന ആക്രി സാധനങ്ങള്‍ പെറുക്കാന്‍ ഇറങ്ങിയപ്പോഴായിരുന്നു മുത്തു അപകടത്തില്‍പ്പെട്ടത്. ആശുപത്രിയില്‍ എത്തിച്ച ഇദ്ദേഹം അപകടനില തരണം ചെയ്തതായി പോലീസ് അറിയിച്ചു.