ഇരിങ്ങാലക്കുട: 30 വര്‍ഷത്തെ കാത്തിരിപ്പിനൊടുവില്‍ 55കാരി സിസിക്ക് പിറന്നത് മൂന്നു കണ്‍മണികള്‍. ഒരു പെണ്ണും രണ്ട് ആണ്‍കുട്ടികളുമാണ് ഇരിങ്ങാലക്കുട കാട്ടൂര്‍ കുറ്റിക്കാടന്‍ വീട്ടില്‍ ജോര്‍ജ് ആന്റണിയുടെയും ഭാര്യ സിസിയുടെയും ജീവിതത്തിലേയ്ക്ക് വെളിച്ചവുമായി എത്തിയത്. മൂന്നു പേര്‍ക്കും ശരീരഭാരം ഒന്നര കിലോഗ്രാമിനു മുകളിലാണ്.
മൂവരും അമ്മയോടൊപ്പം സുഖമായിരിക്കുന്നു. കാത്തിരിപ്പിനൊടുവില്‍ മൂന്നുകണ്‍മണികളെ ഒരുമിച്ച് ലഭിച്ച സന്തോഷത്തിലാണ് കുടുംബം. സന്തോഷത്തിലാറാടുന്ന നിമിഷം കൂടിയാണിത്. വിവാഹം കഴിഞ്ഞ് 34 വര്‍ഷത്തിനു ശേഷം കുട്ടികള്‍ പിറന്നത്. 1987 ലാണ് ജോര്‍ജും സിസിയും വിവാഹിതരാകുന്നത്. 18 വര്‍ഷത്തോളം ഗള്‍ഫില്‍ ആയിരുന്നു ജോര്‍ജ്. പിന്നീട് നാട്ടിലെത്തി ഇരിങ്ങാലക്കുടയില്‍ സ്വന്തം ബിസിനസ് ആരംഭിച്ചു. ഇതിനിടയില്‍ ഗള്‍ഫിലും നാട്ടിലും ചികിത്സകള്‍ നടത്തിയെങ്കിലും കുട്ടികള്‍ ഉണ്ടായില്ല.
കഴിഞ്ഞ ജൂണില്‍ നിര്‍ത്താതെയുള്ള രക്തസ്രാവം അലട്ടിയപ്പോള്‍ ഗര്‍ഭപാത്രം നീക്കം ചെയ്യാന്‍ കൊച്ചിയിലെ സ്വകാര്യ ആശുപത്രിയിലെത്തിയിരുന്നു. ചികിത്സ കഴിഞ്ഞപ്പോള്‍ അവിടത്തെ ഡോക്ടറുടെ നിര്‍ദേശ പ്രകാരമാണ് മൂവാറ്റുപുഴയിലെ സബൈന്‍ ആശുപത്രിയില്‍ എത്തിയത്. ഇവിടെ ഡോ. സബൈന്‍ ശിവദാസിന്റെ നേതൃത്വത്തിലായിരുന്നു ചികിത്സ. ഒടുവില്‍ കഴിഞ്ഞ ജൂലൈ 22ന് ആഗ്രഹം പോലെ സിസി അമ്മയായി.