കൊച്ചി: ഇത്തവണത്തെ എസ്എസ്എല്‍സി ഫലം പുറത്തുവന്നതോടെ ഫുള്‍ എ പ്ലസ് കിട്ടിയവര്‍ക്ക് നിറയെ അഭിനന്ദനങ്ങള്‍ നിറഞ്ഞിരുന്നു. അതേസമയം എ പ്ലസുകളുടെ എണ്ണം കുറഞ്ഞതിലും തോറ്റതിലുമൊക്കെ വിഷമിച്ച് കഴിയുന്നവരെ ആശ്വസിപ്പിച്ചും കുറേപേര്‍ രംഗത്തെത്തിയിരുന്നു. യുവവ്യവസായി സുധി തോറ്റവര്‍ക്ക് കൊടൈക്കനാലിലേക്ക് ഫാമിലിയോടൊപ്പം സൗജന്യയാത്രയും വാഗ്ദാനം ചെയ്തിരുന്നു.
ഇപ്പോള്‍, എസ്എസ്എല്‍സിക്ക് മികച്ച വിജയം കൈവരിക്കാന്‍ ആകാതെ പോയവര്‍ക്ക്
ഒന്നാന്തരമൊരു ‘മോട്ടിവേഷന്‍’ നല്‍കുകയാണ് ജിയോ ക്രിസ്റ്റി ഈപ്പന്‍.
പത്താം ക്ലാസില്‍ തേര്‍ഡ് ക്ലാസ് ആയിരുന്ന താന്‍ ജീവിതത്തില്‍ പിന്നിട്ട വിജയവഴികളാണ് ഇപ്പോള്‍ രാജീവ് ഗാന്ധി സെന്റര്‍ ഫോര്‍ അക്വാകള്‍ച്ചറിന്റെ മറൈന്‍ ഫിന്‍ഫിഷ് ഹാച്ചറി പ്രൊജക്ടിന്റെ പ്രോജക്റ്റ് ഇന്‍ ചാര്‍ജ് ആയ ജിയോ പങ്കുവെക്കുന്നത്.
‘പത്താം ക്ളാസിൽ ഫുൾ A + കിട്ടാത്ത എല്ലാ മിടുക്കരുടെയും ശ്രദ്ധയ്ക്ക്.
ഫുൾ A + പോലും. കോപ്പാണ്.
ഈ തൂങ്ങിക്കിടക്കുന്ന ഞാൻ പത്താം ക്ളാസിൽ 3rd ക്ളാസ് ആണെന്ന്. !
തലക്കകത്ത് കേറാത്ത കണക്ക് പ്രീഡിഗ്രിക്ക് ഒഴിവാക്കി 2nd ഗ്രൂപ്പ് എടുത്തപ്പോ 2nd ക്ളാസ് വാങ്ങി. അതിൽ പണി തന്ന ഫിസിക്സ് തൂക്കി എറിഞ്ഞ് സൂവോളജി എടുത്തപ്പോ 1st ക്ളാസായി. പിന്നെ കെമിസ്ട്രിയും കളഞ്ഞ് എല്ലാരും ചിരിച്ച് തള്ളിയ സൂവോളജി പഠിച്ച് 1st ക്ളാസിന്റെ സ്റ്റാൻഡേർഡ് ലേശം കൂട്ടി.
കമ്പ്യൂട്ടർ അറിയാത്തതിന് “നിനക്ക് പറ്റിയത് ചീട്ടുകളി ആണെടാ” എന്ന് പറഞ്ഞ് ഇറക്കിവിട്ട ടീച്ചറുടെ ക്ളാസീന്ന് നേരെ മുണ്ടും മാടിക്കുത്തി ഇറങ്ങി മഹാരാജാസിന്റെ ഗേറ്റിലെ അമൃതാ ബുക്സ്റ്റോളിന്ന് 40 രുപക്ക് വാങ്ങിയ “കമ്പ്യൂട്ടർ കളിക്കാം പഠിക്കാം” എന്നോ മറ്റോ പേരുള്ള പുസ്തകം (റാണാപ്രതാപൻ കെ ശേഖരൻ സാറെഴുതിയത്- എന്ന് ഈ പോസ്സ്റ്റിന് ശേഷം പിടികിട്ടി സാറിന്റെ കമന്റിൽ നിന്ന്) വായിച്ച് ചിറ്റൂർ റോഡിലെ കഫേയിൽ പോയിരുന്ന് എം. എസ് ഓഫീസ് പഠിച്ച് ആ ടീച്ചറിന്റെതടക്കം റെക്കോർഡ് ബുക്കിന്റെ ഫ്രണ്ട് പേജുകൾ സ്വയം ഡിസൈൻ ചെയ്ത് ഡി റ്റി പി ചെയ്ത് നൈസായിട്ട് പകരം വീട്ടി. (2002-ൽ ആണ് സംഭവം)
കൂടെ പഠിച്ച പഠിപ്പിസ്റ്റുകളെ പിന്നിലാക്കി Net പാസായി.
എറണാകുളത്ത് പൊരിവെയിലത്തും ടൈയ്യും കെട്ടി പുസ്തകം വിറ്റ് നടന്ന് ഇംഗ്ലീഷ് പറയാൻ പഠിച്ചു.
പി ജി ക്ക് എന്നെ പഠിപ്പിച്ച ഗസ്റ്റ് ലക്ചററിനോടൊപ്പം പങ്കെടുത്ത സൂവോളജി യു ജി സി സബ്സ്റ്റിറ്റ്യൂട്ട് അദ്ധ്യാപക ഒഴിവിൽ ആ പാവത്തെയും പിന്നിലാക്കി മൂന്ന് വർഷം കോളജ് അദ്ധ്യാപകനായി. വൈവയ്ക്ക് വന്ന ജോർജ് ഏബ്രഹാം സാറിനൊപ്പം പഠിപ്പിച്ചു. പി ജി ക്ക് പഠിപ്പിച്ച പ്രിയപ്പെട്ട വിജയകുമാരി ടീച്ചറിനൊപ്പം എം ജി വാഴ്സിറ്റി പോസ്റ്റ് ഗ്രാജ്വേഷൻ പരീക്ഷകളുടെ പേപ്പർ വാല്യുവേഷനും കൂടി.
ഇടക്കാലത്ത് ട്യൂഷനെടുത്തപ്പോൾ കിട്ടിയ ഇക്കണോമിക്സ് അറിവുവച്ച് സമുദ്രോത്പന്ന കയറ്റുമതി വികസന അതോറിറ്റിയുടെ നേഷൻ വൈഡ് ഇന്റർവ്യൂവിൽ ഒരേയൊര് ഒഴിവിൽ തൊഴിലിന് കയറി.
ഇതിനിടെ പി എസ് സിയുടെ സൂവോളജി കോളജ് അദ്ധ്യാപക പരീക്ഷയുടെ റാങ്ക് ലിസ്റ്റിലും കയറി. പിന്നെ അറിയാത്ത ജലകൃഷി ചെയ്ത് പഠിച്ച് ഇന്ന് രാജീവ് ഗാന്ധി സെന്റർ ഫോർ അക്വാകൾച്ചറിന്റെ മറൈൻ ഫിൻഫിഷ് ഹാച്ചറി പ്രൊജക്ട് പ്രോജക്റ്റ് ഇൻ ചാർജ് ആയി മാന്യമായി ജീവിക്കുന്നു.
ഒരു ബഞ്ചിൽ ഒപ്പമിരുന്ന് പത്തിൽ 3rd ക്ളാസ് വാങ്ങിയ വേറൊരു ഗഡി ഉണ്ട്. ഹിജാസ് കെ ബഷീർ. അവൻ ഇന്ന് ജിയോളജിക്കൽ സർവ്വേ ഒഫ് ഇന്ത്യയിൽ സയന്റിസ്റ്റ് ആണ്..
പണ്ട് പി എസ് സി ഇന്റർവ്യൂവിൽ ചോദിച്ച അവസാന ചോദ്യം ഇതായിരുന്നു.
“താങ്കൾ ഒരു “ഗുരു” ആകണം എന്ന് എഴുതിയിരിക്കുന്നു റെസ്യൂമെയിൽ. എന്താ “ടീച്ചർ” എന്ന് എഴുതാത്തത് !?” എന്ന്.
ഉത്തരം കൊടുത്തു.
“Sir, A teacher is someone. who teaches his students what he learned from a particular subject but a ‘Guru’ is someone who shows his desciples what he learned from his life, so that the desciple will follow what is right “. എന്ന്.
തീർന്നില്ല.
“സർ എനിക്ക് ന്യൂമെറിക്കൽ ഡിസെബിളിറ്റി ഉണ്ട്. 70×30 എത്രയാണെന്ന് സാർ ചോദിച്ചാൽ എനിക്ക് പറയാനാകില്ല പക്ഷെ എന്റെ മുൻപിലിരിക്കുന്ന എന്റെ വിദ്യാർത്ഥികളിൽ ഒരുവന് ഇതേപോലുള്ള അവസ്ഥ ഉണ്ടെങ്കിൽ അവനെ എനിക്ക് തിരിച്ചറിയാനും സഹായിക്കാനും ആകും.
That’s the reason why I want to be a Guru rather than a mere teacher” -എന്ന്.
അന്ന് പി എസ് സിഇന്റർവ്യൂ ബോർഡ് ചെയർമാൻ അന്ന് തന്ന ഹാൻഡ് ഷെയ്ക്ക് എനിക്ക് ധാരാളം മതിയെന്ന്.
സർക്കാർ വക കോളജ് അദ്ധ്യാപന ഉദ്യോഗം കിട്ടിയില്ല. എന്നാലും പുല്ലാണെന്ന്. ഇതിനോടകം ആയിരക്കണക്കായ ജനങ്ങൾക്ക് മാന്യമായി ജീവിക്കാനും വിജയിക്കാനുമുള്ള മാർഗം കാട്ടിക്കൊടുക്കുന്ന ആളാണ് ഞാൻ. ഇന്നും. ഇനിയും. അതല്ലേ “ഗുരു” എന്നതിന്റെ സാരവും.
പോകാൻ പറടാ ഉവ്വേ..
ഫുൾ എ പ്ളസ് ഇല്ലാത്തവരുടെ കളി തന്തതള്ളമാരും സാറൻമാരും കാണാനിരിക്കുന്നേയുള്ളെന്ന് പോയി പറഞ്ഞേക്ക്.
P.S: സകലമാന ഗുരുക്കൻമാർക്കുമായി ഒരു ലോഗോയും ഡിസൈൻ ചെയ്ത് കൊടുത്തിട്ടുണ്ട് പണ്ടത്തെ 3rd ക്ളാസുകാരൻ. “Logo for teachers ” എന്ന് ഇമേജ് സെർച് ചെയ്താൽ ആദ്യം കാണുന്ന വിക്കിപീഡിയ ലിങ്കിൽ’.
