തിരുവനന്തപുരം: മീൻ വിൽപ്പനയിൽ ഉൾപ്പടെ അമ്മൂമ്മയെ സഹായിക്കുന്ന പതിനൊന്നുകാരൻ അഭിജിത്തിന്റെ സ്വപ്‌നം പോലീസിൽ ചേരണമെന്നാണ്. ഏറെ കഷ്ടപ്പെടുന്നതും തന്റെ സ്വപ്‌നത്തിലേക്ക് എത്താനാകുമെന്ന പ്രതീക്ഷയിലാണ്. ഇപ്പോഴിതാ, കുഞ്ഞ് അഭിജിത്തിന്റെ ആഗ്രഹമറിഞ്ഞ് കുരുന്നിനെ നേരിട്ട് പോലീസ് ആസ്ഥാനത്തേക്ക് വിളിപ്പിച്ച് അനുമോദിച്ചിരിക്കുകയാണ് സംസ്ഥാന പോലീസ് മേധാവി അനിൽകാന്ത്.
തിരുവല്ലം പുഞ്ചക്കരി തമ്പുരാൻമുക്ക് സ്വദേശി സുധാദേവിയുടെ ചെറുമകനാണ് ഏഴാം ക്ലാസ് വിദ്യാർത്ഥിയായ അഭിജിത്ത്. ചെറുപ്പത്തിലെ തന്നെ മാതാപിതാക്കൾ ഉപേക്ഷിച്ച അഭിജിത്തിനെയും എട്ടാം ക്ലാസ് വിദ്യാർത്ഥിനിയായ സഹോദരിയെയും പോറ്റുന്നത് അമ്മൂമ്മ സുധാദേവിയാണ്. പുലർച്ചെ മീൻ വിൽപ്പനയ്ക്കായി ഇറങ്ങുന്ന അമ്മൂമ്മയ്ക്ക് ഒപ്പം ചേർന്നാണ് അഭിജിത്ത് നാട്ടുകാരുടെ ഓമനയായത്. ഈ കുരുന്നിന്റെ കഷ്ടപ്പാട് മാധ്യമങ്ങളിലും വാർത്തയായിരുന്നു. ഇതിന് പിന്നാലെയാണ് പോലീസിൽ ചേരണമെന്നാണ് അഭിജിത്തിന്റെ ആഗ്രഹമെന്നറിഞ്ഞ് പോലീസ് സേന ഒന്നാകെ ഈ പതിനൊന്നുകാരന് അഭിനന്ദനവുമായി എത്തിയിരിക്കുന്നത്.
പോലീസ് സേനയുടെ ഫേസ്ബുക്ക് പോസ്റ്റ്:
പോലീസ് ആകണമെന്ന അഭിജിത്തിന്റെ ആഗ്രഹത്തിനൊപ്പം ചേർന്ന് കേരളാ പോലീസ് . മീൻ വിൽപ്പനയിൽ അമ്മൂമ്മയെ സഹായിക്കുന്ന പതിനൊന്നു വയസുകാരൻ അഭിജിത്തിന്റെ പോലീസ് മോഹം മാധ്യമങ്ങൾ വഴി അടുത്തദിവസങ്ങളിലാണ് നാടറിഞ്ഞത് . പോലീസിൽ ചേരണമെന്ന ആഗ്രഹവുമായി കഠിനാധ്വാനം ചെയ്യുന്ന ഈ കുരുന്നിനെ സംസ്ഥാന പോലീസ് മേധാവി അനിൽകാന്ത് പോലീസ് ആസ്ഥാനത്ത് വിളിച്ചുവരുത്തി അനുമോദിച്ചു.
തിരുവല്ലം പുഞ്ചക്കരി തമ്പുരാൻമുക്ക് സ്വദേശി സുധാദേവിയുടെ ചെറുമകനാണ് ഏഴാം ക്ലാസ് വിദ്യാർത്ഥിയായ അഭിജിത് . ചെറുപ്പത്തിലെ തന്നെ മാതാപിതാക്കൾ ഉപേക്ഷിച്ച അഭിജിത്തിനെയും എട്ടാം ക്ലാസ് വിദ്യാർത്ഥിനിയായ സഹോദരിയെയും പോറ്റുന്നത് സുധാദേവിയാണ് . പുലർച്ചെ നാലുമണിക്ക് മീൻ കച്ചവടത്തിനിറങ്ങുന്ന അമ്മൂമ്മയെ തന്നാലാവും വിധം സഹായിക്കുകയാണ് അഭിജിത് . വിഴിഞ്ഞത്ത് നിന്ന് മീൻ എടുത്ത് അമ്മൂമ്മ മടങ്ങിയെത്തിയാൽ ആറ് മണിയോടെ കുഞ്ഞ് അഭിജിത്തും സൈക്കിളിൽ വീട്ടിൽ നിന്ന് പുറപ്പെടും . വീടുകളിൽ മീൻ ആവശ്യമുണ്ടോ എന്ന് തിരക്കും . മീൻകുട്ട സൈക്കിളിന് പുറകിൽ വച്ച് അമ്മൂമ്മയോടൊപ്പം ആവശ്യക്കാരുടെ അടുത്തേയ്ക്ക് . കച്ചവടമൊക്കെ കഴിഞ്ഞ് വീട്ടിലെത്തിയാൽ പിന്നെ പഠനം . രാത്രിയിൽ ഓൺലൈൻ ക്ലാസ് . ഇതാണ് അഭിജിത്തിന്റെ ദിനചര്യ.
നന്നായി പഠിച്ച് ഒരു പോലീസ് ഉദ്യോഗസ്ഥനാകാൻ അഭിജിത്തിനെ ഉപദേശിച്ച സംസ്ഥാന പോലീസ് മേധാവി കുട്ടിക്ക് പോലീസിന്റെ വകയായി ഒരു ലാപ്‌ടോപ്പ് സമ്മാനിച്ചു . പോലീസ് സമ്മാനിച്ച സേനയുടെ പ്രത്യേക നിറത്തിലുളള യൂണിഫോം ധരിച്ചാണ് അഭിജിത് പോലീസ് ആസ്ഥാനത്തെത്തിയത്.
Discussion about this post